Nongpoh, Naitung 09: Ka seng Ri-Bhoi Youth Federation (RBYF), Western Zone kala pynpaw ïaka jingbitar kaba jur halor ka jing bym biang bording haka thaiñ Western Ri-Bhoi ba ki paidbah kila hap ban shu shong dum mynta la bun sngi naka sngi jinglip khah khah jong ka bording elektrik kaba la pynsyrtok shikatdei ïaki paidbah ban pyndep ïaki kam ki jam bad khamtam ki samla pule.
Naka liang u Samla Rhemdor Nongtri Publicity Secretary jong ka seng u la ong ba kum ka seng kala ngiah shoiñ halor ka jingbym don bording elektrik ha katei ka thaiñ bad ruh ka jingud jong ki paidbah naka por shaka por watla ju pynsngew sha ka sorkar naka por shaka por, kaba la pyndkoh ïaka kam kam jam jong ki paidbah bad kumjuh ruh ka jaka sumar CHC kaba don ha katei ka thaiñ kaba la don ruh ka jingsniew ki dawai tang namar bym don bording ha katei ka thaiñ.
U la ong ruh ba haduh mynta ki paidbah ki dang shong dum ha katei ka thaiñ khlem da tip ïaka daw tynrai bad pynjynjar ïaki paidbah bad naka liang ka seng kala dawa naka sorkar bad khamtam ka tnad MeECL ba dei ban shimkhia halor ka jingeh ki paidbah bad ban pynbiang noh mardor ïaka bording ha katei ka thaiñ naka bynta ka jingbit jingbiang jong ki paidbah.
