Bitar ka GSU ba shah pynïap ka samla, dawa pynshitom ïa ki ophisar bym kitkhlieh ïa ka kam

Shillong, Naitung 21: Ka Garo Students’ Union (GSU), Eastern Zone, ka la pynpaw ka jingdom bad jingbitar kaba jur bha halor ka jingshah pynïap ba shyrkhei jong kawei ka samla hapoh ka shnong Samgong, East Garo Hills bad ka la dawa ba dei ban thung da ka jingtohkit majistor kaba khuid, nangta ba dei ban siew kaba lutksan bad ban pynshitom ïa ki ophisar kiba donkti ha kane ka kam leh bym suitñiew ne bym kitkhlieh.
Katkum ka jingong ka GSU, la ïathuh ba katei ka lanot ka la leit ban ïakren ha ka One Stop Centre (OSC) kaba ha Williamnagar ban pan ki lad jingïada halor ka jingshah byrngem pynïap ba la kynnoh ba la byrngem da u samla jong ka.
Wat hapdeng ba la pyntip ïa ki pulit, kam shym la don ka jingai jingïada ne ka jingai jingshngaiñ, bad ïa ka lanot la kynnoh ba la bthah ba kan leit sha ka jaka ba la dep tip lypa da utei uba la shah kynnoh khlem da ïoh ka jingsynran jong ki pulit.
Ka union ka la kynnoh ba ka ophisar OSC la ïathuh ba ka la ai ïa katei ka lanot bad ki paralok jong ka, ka pisa T. 40 bad la phah ïa ki sha ka jaka kaba utei uba la kynnoh ba pynïap u la dep tip, bad kynnoh ruh ba kane ka long kum ka jingïarap ban lap ïa u.
“Kumta ngi dawa ïa u deputy commissioner ban thaw da ka jingtohkit majistor kaba laitluid bad kaba khuid ban sei madan lut ïa baroh ki jingshisha,” ong ka GSU ha ka kyrwoh ba la pynlait ha ka sngi Nyngkong.
Haba dawa ba dei ban kem mardor bad ban pynshitom ïa utei uba la shah kynnoh hapoh ki kyndonkam kiba ïadei bad ka BNS bad POCSO, ka union ka la dawa ruh ka pira T. 10 lak kaba dei ka bailutksan bad ban ai ka jingkyrshan kaba pura haba ïadei bad ka kam aiñ sha ka ïing ka sem jong ka lanot.
“Ngi dawa ba dei ban don ka jingshim kam na ka tnat bad ban pynsangeh kam shipor ïa kino kino ki ophisar paidbah lada shem ba ki la leh bakla bym kheiñ snem ïa la ka kamram,” ka la ong da kaba banjur ïa ka jingdonkam ban wanrah jingpynkylla thymmai ïa ka OSC bad ki Women Police Station protocol ban pynthikna ki lad jingïada haba ïadei bad ki jingwan ki jingujor.
“Kane kam dei tang ka kam ka jingpulom jong ki riew shimet, hynrei ka pynphalang ïa ka jingpulom ki rukom treikam. Ka lanot ka la ïaid da ka lynti ka aiñ, ka la shaniah ha ka rukom treikam bad ka la shah shet kylla. Ka jingïap jong ka, kala long kaba sngewsih kaba la mih na ka jingbym shimkhia ka jaka treikam bad kane kam dei ban dang wanjia biang hadien habud,” ong ka kyrwoh na ka GSU.
Ha ka jingïalang kaba la long ha kane ka sngi, u Superintendent of Police, Williamnagar, u la pynthikna ïa ka GSU ba ka In-Charge jong ka Williamnagar Women Police Station ka la shah pynsangeh kam shipor bad ka jingtohkit halor kane ka dang ïaid shakhmat.