Nongpoh, Ïaiong 12: Da ka jingbitar kaba jur halor ka jingshah kem ki 3 ngut ki samla khasi haki pulit Assam kiba dei ki nongshong shnong ka shnong Sabuda haka thaiñ Block II, ki paidbah naka shnong Sabuda naduh ki longkmie longkpa bad ki nongïalam shnong mynta ka sngi kila mih paidbah ban pyrshah jur bad dawa pynlait noh ïa kitei ki 3 ngut ki samla na kti ki pulit Assam ba dei ban wanrah noh sha ka jylla, namar ka jingkynnoh bad pynngat jubor ba ki thmu ban thang ïaka jingkieng Umler khlem kano kano ka jingshisha bad kadei tang ka jingkynnoh ba khlem nongrim.
Kum ban shu pynpaw ba 3 ngut ki samla khasi ba kynthup ïa u samla Barson Lawai, Stanling Khriam bad u Dispar Mukhim naka shnong Sabuda kila shah kem haka miet jong ka 10 tarik mynta u bnai naka shnong Umpaklong haki pulit Assam kiba la shu kynnoh jubor ba ki thmu ban thang ïaka jingkieng Umler ha kaba ki paidbah bad ki nongïalam shnong kila pynpaw ruh ba kadei tang ka jingleh arsap jong ki pulit Assam kiba thmu ban kput ïaki samla Khasi khlem kano kano ka jingshisha bad katei ka jingkynnoh jong ki ka dei ka bym don nongrim kaba lah ban dei tang ka jingshim kabu naka jingjia kaba la jia haka shnong Jatalong.
Naka liang ki bor district jong ka Ri-Bhoi District bad West Karbi Anglong District dang shen kila buh ruh ka jingpyrkhing halor ka ïaid ka ieng ki paidbah namar ka dei ka jaka kajia pud ha kaba dang shen kala don ruh ka huri hura kaba la mih naka jingïakynad hapdeng ki Khasi bad Nepali haka shnong Jatalong ha Ri-Bhoi.
La ioh ruh ban ïakren bad katto katne ngut ki nongïalam shnong bad ki paidbah ha kane ka sngi ha kaba kila pynpaw ba hadien ka jingshah kem jong kitei ki 3 ngut ki samla khasi haki pulit Assam, ki nongïalam shnong kila leit ruh ban jngoh bad sakhi da la ki jong ki khmat ïa katei ka jingkieng Umler kaba kila lap ba kam shym la don satia kano kano ka dak thang lane ka jingpynjulor kumba la kynnoh da ki pulit Assam bad katei ka jingkieng ka don kumba ju don ha katei ka shnong.
Kila ong ruh ba kane ka dei tang ka jingshim kabu jong ki pulit Assam kiba thmu ban kput ïaki samla khasi ha katei ka thaiñ ha kaba bun naki kmie ki kpa kila pynpaw ba ki syier wat ban pynmih ïala ki jong ki khun nala iing namar ka jingleh donbor jongki pulit Assam wat ban khang ruh ïaka leit ka wan ki paidbah da kaba buh da ka khyrdop ha Sabuda kaba kum ki paidbah ki shem jingeh shikatdei kaba dei ruh ka nongrim kaba kila mih paidbah mynta ka sngi ban pynrem jur ïaka jingleh donbor ki pulit Assam ha katei ka thaiñ.
La ioh jingtip ruh ba ïa kitei ki 3 ngut ki samla la rah noh sha Ulukunchi Outpost kaba hap ha Boithalangso PS jong ka West Karbi Anglong District Assam.
Shuh shuh naka liang ki nongïalam shnong bad ki paidbah ha katei ka sngi kila rah ruh da ki placard ban pynrem jur ïaki pulit Assam bad kyrpad ïaka sorkar Meghalaya ba kan tuklar ïa katei ka kam ban wanrah noh ïa kitei ki samla khasi sha ka jylla bad ai ba ki pulit ka Jylla Meghalaya kin tohkit ïa katei ka kam kumba kitei kiba shah kem ki dei ki samla khasi.
