Bishar kam u Myntri halor ki projek jingtei ïa ka flyover bad jingkieng thymmai yn tei haduh Barik

Shillong, Nohprah 09: U Symbud Myntri Rangbah ka jylla u ba khmih ïa ka tnat PWD (Roads) u Bah Prestone Tynsong ha ka sngi baar u la bishar ïa ka kam tyrwa ban tei ïa ka flyover bad ki projek jingkieng ba thymmai ha nongbah Shillong.
Haba kren bad ki lad pathai khubor hadien ka jingïalang, u Bah Tynsong u la ong ba ka sorkar pdeng ka la mynjur halor ki nongrim ban pynïar ïa ka jingjngai jong ka flyover sha Barik point ha jaka ban pynkut haduh Anjalee petrol pump barim.
“Katkum ka jingtyrwa kaba mynshwa ka flyover kan kut haduh Anjali petrol pump barim hynrei suki suki haba ngi kyrpad ïa ka sorkar India ban pynïar ïa ka flyover haduh Barik point, kaba ki la mynjur halor ka nongrim,” u la bynrap da kaba ong, “Mynta wat ka kam jaka, ka design jong ka flyover la nang khmih bad pynkhreh da ka NHIDCL kaba dei ban poi haduh Barik.”
U Symbud Myntri Rangbah u la pynbna shuh shuh ba ka jingkieng thymmai ba la shna hapoh ka Umïam dam bridge yn pyntreikam noh ha u bnai Lber 2026.