Bishar kam u Lamphang halor ki jingtei ïa ka Iing Dorbar thymmai ha Mawdiangdiang
Ha u Jylliew yn pyndep ïa Assembly thymmai
Shillong, Nohprah 08: Ka jingïalang bishar bniah ïa ki kam haba ïadei bad ka jingtei ïa ka Ïing Dorbar Thaw Aiñ kaba thymmai ha Mawdiangdiang la pynlong ha ka nohphai sngi hapoh Conference Room jong ka Assembly Hostel, Khyndailad.
Ïa ka jingïalang la pynïaid da u Lamphang ka Ïing Dorbar Thaw Aiñ u Thomas A. Sangma, ha ryngkat bad u Symbud Myntri Rangbah ka jylla uba khmih ïa ka Parliamentary Affairs, u Bah Prestone Tynsong.
U Commissioner and Secretary, Meghalaya Legislative Assembly, u Bah Andrew Simons bad kiwei ki heh ophisar na ka tnat Finance, ka tnat Parliamentary Affairs, PWD (Buildings), NIC Meghalaya, bad ki ophisar napoh ka Meghalaya Legislative Assembly Secretariat ki la donlang ha kane ka jingïalang.
Kane ka jingïalang bishar kam la khot ban shim jingkheiñ halor ki kam kiba la ïaid mynta halor ka jingtei ïa ka Ïing Dorbar Thaw aiñ ba thymmai bad ki kam ba khmat kiba ïadei bad ki jingpyntreikam ïa kane ka project. U Lamphang u la ong ba kane ka jingïalang bishar kam kaba manla ka bnai ka la synniang bha ban ïoh khmih ïa ki jingbha jong ka kam bad ki jingpynïaid kloi jong ka kam.
Haba kren hadien ka jingïalang, u Thomas A. Sangma u la ong, “Nga kmen ban sam ba ka jingïalang ka la long kaba don jingmih bha. Da kine ki jingïalang bishar kam ba khah khah, ngi la lah ban khmih jan ïa ki jingïaid jong ki kam bad ban ithuh ïa kiei kiba dang donkam ban leh ban lah ban pynïaid shakhmat ïa ki kam.”
U Lamphang u la pynskhem biang ba ka por ba la buh mynshwa ban pyndep ïa ka main Assembly Hall ka neh kumjuh khlem don jingkylla, da kaba buh ïa kajuh ka thong ba ha u bnai Jylliew 2026 yn lah ban pyndep noh ïa ka kam. U la bynrap ba shisien ba la pyndep ïa ka main hall, ïa ka ïing dorbar ki MLA la lah ban khot pynlong noh mardor hapoh ka ïing dorbar thaw aiñ kaba thymmai.
U Sangma u la pyntip ruh ba kin sa pynlong ïa ka jingleit jurip ïa ka jaka jong ka project ha ka 11 tarik mynta u bnai ban lap dalade ïa ka jingïaid ka kam bad ka rukom trei ïa ka kam jingtei.