Bhah ka Meghalaya – Assam ïa ka NESAC ban wadbniah halor ka jingshlei um ba shyrkhei ha Sor Guwahati
Shillong, Jylliew 02: Ka Sorkar Meghalaya bad ka jylla Assam ha ka sngi Nyngkong ki la mynjur ban bhah ïa ka kam ha ka North Eastern Space Application Centre (NESAC) ba kan pynlong ïa ka jingwadbniah lyngba ki kor satellite halor ka jingshlei um ba shyrkhei jong ka sor Guwahati ha kine ki sngi ba la leit.
Ïa kane ka rai la shim ha ka jingïalang hapdeng ki Myntri Rangbah ki ar Jylla ba kynthup ïa u Conrad K Sangma bad u Himanta Biswa Sarma, kaba long ha nongbah Guwahati.
Ha ka jingïalang la ïathuh ba katkum ka rai, ka NESAC kan pynlong ïa ka jingwadbniah lyngba ka jingring dur na ki kor satellite ïa ki khlaw bapher bapher ha ka thaiñ khappud ka Jylla Meghalaya bad Assam bad ban ba ka dei ban aiti ïa ka kaiphod hapoh ki lai bnai.
Haba kren sha ki lad pathai khubor u Myntri Rangbah ka jylla u Conrad K Sangma u la ong, “Ngi la rai ban ïakren ïa ka NESAC ba kan pynlong ïa ka jingwadbniah lyngba ki kor satellite, la ka long ïa ki khlaw bapher bapher, la kadei ïa ki wah ne ki nala kiba tuid um, la kadei ïa ki jaka ba sahkut ka um. Shisien ba la dep kane ka jingwad bniah ha ki khyndiat bnai ban wan, ngin sa ïakren ïa ki agency kum ka IIT Roorkee ba kan bishar ban wanrah ïa ki sienjam ban weng ïa kane ka jingeh kiba lah ban pyntreikam da baroh ar Jylla bad ka ban pynmyntoi ïa baroh ar tylli ki Jylla.”
Haba ïathuh ïa ka jingsngewkhia halor ka jingshlei um ha Guwahati, u Myntri Rangbah ka Meghalaya ula pynpaw ba kumno ki artylli ki jylla kin lah ban ïatreilang ha ka ban wad ïa ki lad ki lynti ban pynduna noh ïa kane ka jingshlei um bad wad ruh ïa ki lynti ban leh eiei halor ki jingeh jong ki paidbah ba sah sha ka liang ka Meghalaya, khamtam kito kiba die jingdie ban kamai jakpoh bad kiwei pat ki lad kamai.
Ha kane ka jingïalang ka kynhun na Meghalaya kiba la ïadonlang ki kynthup ïa u Myntri ka tnad Jngohkai u Bah Paul Lyngdoh bad u Chief Secretary Bah D P Wahlang bad kiwei ki heh Sorkar. Na ka liang ka jylla Assam pat la synran lang da u Myntri Rangbah u Himanta Biswa Sarma, nangta ki Myntri Sorkar bad ki heh ophisar nalor kiwei.