Shillong, Risaw, 28: Ki nongïalam jong ka Hynñiewtrep Integrated Territorial Organisation (HITO) Shillong City ha ka Lah Sngi u Blei ki la mudui da ka ejahar sha ki Pulit pyrshah ïa kawei ka thei Khasi ba la tip kyrteng kum ka Anisha kaba sah ha nongbah Bangalore, Karnataka kaba la ai kyrteng ïa lade kum ka ‘@queen-beb-7811 ha ka Instagram.
Ka video ba ka Anisha ka la beiñ da ki ktien ba pynpohdor ïa ka jaibynriew Khasi, ïa ki sengbhalang, ïa ki seng longkmie bad ïa ka tnat Pulit Meghalaya da kaba leh Live Stream ha ka Instagram ka la pur stet bha ha ka social media kat haduh ba kiba peit ïa kane ka video kim lah khlem da pynrem jur ïa kane ka samla.
Ha ka ejahar ka seng ka la pynpaw ba ki jingkren pohdor kiba ktah mationg ïa ka jaidbynriew Khasi ka la pynmong ïa kiba bun balang.
U General Secretary jong ka seng u Bah Balajied Jyrwa ha ka jingïakren bad ki lad pathai khubor hadien ba la mih na ophis u Superintendent of Police ka East Khasi Hills u la ong, “mynta ka sngi ngi la ujor da ka ejahar pyrshah ïa kane ka briew kaba ka video jong ka, ka la saphriang ha kine ki sngi kaba kren da ki kyntien kiba ktah ïa ka jaidbynriew bad kaba la pynmong ïa kiba bun ki briew da ka jingkren tohmet khamtam ïa ki Khasi, ïa ki khynnah Khasi jong ngi ka jingkren jong ka, ka la long shaba palat. Ka la leh ruh ïa ki kam ba lah i ishyrkhei.”
“Ngi kyrpad ïa ki bahaing hasem jong kane ka briew ki dei ban shimkhia ban wan ïalam noh sha la ing ban sneng ban kraw ïa ka khnang ba kan lait na ki rukom leh thala jong ka,” la ong u Bah Jyrwa.
“Ngi la ïakynduh ïa u SP bad ngi la kyntu ruh ba un shimkhia ïa kane ka kam,” la ïathuh u Bah Jyrwa.
“Ngi kyrpad ïa ki paradoh parasnam ba kin report noh ïa ka Instagram Account jong kato ka briew khnang ba na ka liang jong ka Meta na ka Instagram bad ka Facebook ruh kin khang (block) noh ïa ka Account namarba kato ka thad ïa ka jaidbynriew bad ka thad ïa ka jinglong Khasi jong ngi bad ngi tip ruh ba ma ngi baroh ngim long kumta bad baroh ki khynnah Khasi kim long hi ruh kumta kumba kren ma ka. Ngi kyrmen ba u SP un sa shimkhia ïa kane ka jingujor jong ngi khamtam ka jingkren jong ka ïa ki Pulit, ïa ki sengbhalang, ki seng longkmie ka kren da ki ktien sih tien sang,” la ong shuh shuh u Bah Jyrwa.
U la ïathuh ba ka seng ka la aiti ruh ïa ka Video lyngba u Pendrive sha ka ophis jong u SP bad bynrap ruh ba u SP u la pyntip sha ka seng ba ka tnat Pulit kan sa khot hajir ïa ka Anisha ha kine ki khyndiat sngi ban pynlong ïa ka jingtohkit.
