Bei pisa ka KTIEW EMS Trust ban shna pynbha ïa ka Hall ha Dr. H. Gordon Roberts Hospital

Shillong, Jylliew, 24: Ka KTIEW EMS TRUST, London ha ka sngi Balang ka la bteng ban noh jingïarap sha ka Dr. H. Gordon Roberts Hospital, Shillong na ka bynta ban shna pynbha ïa ka Margaret E Buckley Memorial Hall kaba la rim.
Ïa kane ka Hall ba thymmai jong kane ka Hospital, la plie paidbah da u Chief Executive Member (CEM) jong ka Khasi Hills Autonomous District Council (KHADC) u Bah Titosstar Well Chyne uba la long kum u Kongsan ha ryngkat ka jingsakhi lang jong u Bah Michael Kharsyntiew u ksiew jong ka Kong Christina Kharsyntiew kaba long ka nongseng ïa ka KTIEW EMS TRUST, ki dkhot jong ka Governing Body, ki dkhot jogn ka Balang Presbyterian Synod, ki nongtrei jong ka Hospital ba kynthup ïa ki doktor bad ki nos bad kiba la shah khot sngewbha.
Ka jingpynlut haba shna pynbha ïa kane ka Hall ka la kot kum T. 20 lak ïa kaba la noh synñiang ruh da ka KTIEW EMS TRUST bad na ka pla tyngka jong ka Hospital.
Ka jingplie ïa kane ka Hall ka la long ruh kum shi bynta ban rakhe ïa ka sngi wan iuhkjat jong u Thomas Jones ha rilum Khasi, uba la long u Mishoneri jong ka Welsh Presbyterian Mission ban bet ym tang ïa u symbai jingngeit hynrei ban ai ruh sha ka jaidbynriew Khasi ïa ki Alphabet.
Haba kren ha kane ka sngi, u Bah Michael Kharsyntiew u la pynkynmaw ïa ka Governing Body jong ka Hospital shaphang u synñiang u bynhei ba ka Trust ka la noh sha kane ka Hospital kaba la kot haduh 3 klur ha kine ki san snem ba la leit noh.
“Kane kan long kum ka jingai mynsiem ïa ngi baroh ban long kiba kloi ban noh kylluid mynsiem katba lah ei na ka bynta ban kyntiew ïa ka koit ka khiah bad ka pule ka puthi,” u la ong.
U la pynkynmaw ruh ïa u synñiang u bynhei ba la noh da ki mishoneri bad da ka Balang ha baroh kawei ka jylla na ka bynta ban shakri ïa ki paidbah nongshong shnong ha ka liang ka koit ka khiah bad ha ka pule ka puthi khnang ban ym pynkhia than ïa ka jingkit jong ka Sorkar Jylla.
“Lada phi ieid ïa ka Jylla, ki kam jong phi kin kren kham jam ban ïa ki ktien jong phi bad ki kam leh isynei kin iehnoh shadien ïa ki matti na ka bynta ki pateng ki ban sa wan,” u la bynrap.
Ha kajuh ka por u la pynkynmaw katba ka Jylla Meghalaya ka la rakhe ïa ka jingdap 50 snem, ka Dr. H. Gordon Roberts Hospital ka ladep shakri ïa ka imlang ka sahlang la jan palat shispah snem lyngba ka jingïaid lynti ïa ki jingeh bad ki jingshah tynjuh kiba bun jait.