Jowai, K’Lyngkot 22: Ka FKJGP Khliehriat Circle ha ka sngi Balang hapoh ka jingïalam jong u President u Bah Michal Chyrmang bad u Secretary u Bah Just Me Sana hadien ba la ioh ia ki jingujor na ki paidbah ka la leit mar mar ban beh krad ia uwei u bar jylla uba ju die umsoh hapoh ka phyllaw jong ka ophis treikam u Deputy commissioner ka East Jaiñtia Hills.
Ha ka jingtohkit, u bar jylla u la iathuh ba um shym la ioh jingbit eiei ruh em na ka ophis jong u Deputy Commisioner ban die umsoh ha phyllaw jong ka ophis u DC bad shuh shuh ha ka jingtohkit une u bar jylla um don satia wat ïa ka Trading License na ka Jaiñtia Hills Autonomous Districrt Council (JHADC).
Ka seng ka la pynpaw ia ka jinglyngngoh ba kumno une u bar jylla u ïoh ban die umsoh hapoh ka phyllaw jong ka ophis treikam u DC. “Balei ki bor badei peit kim ïohi mo ïa uba shong die jingdie beaiñ,” la buh jingkylli ka seng ia ka ophis u Deputy Commissioner.
“Lada ïa ki trai ri trai muluk ki hap ban ïakhun ban ioh jingbit lane ki hap ban thep da ka Tender ban ïoh buh dukan hapoh phyllaw jong ka ophis treikam u Deputy Commissioner hynrei kumno pat u bym ïoh wat tang ia ka jingbit ruh u ïoh shong sahuh hapoh phyllaw. Ka aiñ ka dei ban long salonsar ia baroh bad kam dei ban noh shilliang,” la bynrap u kyrwoh na u President ka seng u Bah Michal Chyrmang.
