Beh ka lyer UDP ha jaka sor bad ha ki jaka kyndong kynshrot ka Nongstoiñ Constituency

Nongstoiñ, Nohprah 15: Katba nang mih ki sngi ka United Democratic Party ha Nongstoiñ constituency ka la nang kiew sted, haman la ki jaka da ka jingwan pynïasoh jong ki paitbah ban ai jingkyrshan ïa u kyrtong jong ka party ha ka elekshon ban wan. Dang ha ka sngi balang ka 14 tarik Nohprah ki nongïalam ka UDP Nongstoiñ circle ki la hiar sha ki lai tylli ki shnong kata ha Marngor, Laitkseh bad Phyllut ban pynskhem ïa ki nongkitkam bad ki dkhot kiba dei na kiwei ki party, ba kynthup ïa ka NPP, Congress, HSPDP bad PDF kiba la wan ban pynïasoh noh sha ka UDP.
Ïa kam jingpynskhem ïa ki nongkitkam bad ki dkhot ha ka shnong Marngor, la pynlong ha ka por 2 baje nohphai sngi hakhmat ka Marngor Upper Primary School bad ha ka juh ka por la pynlong ruh ïa ka Pre Christmas Football friendly Match. Ha katei ka jingïalang kaba la pynïaid da u bah Sherphulman Sohshang, ha kaba la ïadon ryngkat da ki rangbah shnong, ki longkmie, ki samla bad ki paitbah nongshong shnong. Nalor kata shuwa ban sdang ïa ka jingïalang la pyndeng ïa ki muffler jong ka party da u bah Polestar Nongsiej kyrtong ka party sha baroh ki nongkitkam bad ki dkhot jong ka Parents body,Women Wing bad Youth wing.
U bah Polestar Nongsiej haba kren ha katei ka jingïalang pynskhem ïa ki nongkitkam, u la ong ba um shym poi pyrkhat ba ki paitbah kin kit khia ban wan sha katei ka jingialang, namar u dang dei u ba dang shu mih pyrthei nyngkong ban ïaleh elekshon. Hynrei ka jingwan jong ki paitbah ka pynpaw ba ki kwah ïa ka jingkylla bad ki kwah ruh ban jied da u nongmikhmat u ba dang thymmai.
U la ai mynsiem ïa ki samla pule ba ha kane ka juk ba mynta, kiba la nang la stad kim dei ban ap khmih lynti tang ïa ki kam sorkar, hynrei ki dei ban trei shitom da kaba ïeng ha la ki jong ki kjat da kaba trei shitom, khnang ba kin ym ngop ha ki kam sniew. U la ai nuksa ruh ba kumba long mynta ka jingdon jong ka Donbosco Technical School ha Nogstoiñ, ka dei ka lad kaba bha tam ïa ki samla ban leit pyntbit, khnang ba kin lah nan kyntiew ïa ka kamai kajih ka ïoh ka kot wat la ka jingïoh kamai ka long kaba rit ruh.
Ha shnong Phyllut la pynlong ïa ka jingïalang pynskhem ïa ki nongkitkam ha kaba baroh ki nongshong shnong ki rangbah, ki longkmie bad ki samla ki la ïapoi bad ki la pynrung kyrteng ïalade sha ka UDP. Ki nongialam ka party ki la ong ba haba kheiñ ïa kiba wan rung sha ka UDP na katei ka shnong ka la kot sha ka 75%, namar ba ki nongkyrshan jong ka NPP, Congress HSPDP bad PDF ki la wan lut sha ka UDP.
Ki la ong ruh ba ka jingwan rung jong ki nongkyrshan na kiwei ki party, ka la pynkyndeh mynsiem ïa kiwei pat ki nongshong shnong ha katei ka thaiñ bad ym don jingartatien ba kin sa wan ban pynïasoh sha ka UDP ha ki sngi ban wan. Ha shnong Laitkseh ruh da ki spah ngut ki paitbah naduh ki rangbah, ki longkmie bad ki samla ki la wan ban pynïsoh sha ka UDP bad la pynskhem ïa ki nongkitkam bad ki dkhot ba pura jong ka party ha katei ka shnong.