Shillong, Naitung, 23: Ki Pulit pynïaid kali jong ka Shillong Traffic Police (STP) ha ka sngi Baar ki la bat naphang ïa ki kali rem dor kiba tah platic rong iong ïa ka iit jingkhang kali tang hapoh 24 kynta ba u Superintendent of Police (SP) ka East Khasi Hills District u Bah S. Nongtnger u la pynmih da ka jingmaham ha ka Lah Sngi u Blei.
Ki Pulit kiba pynïaid kali ha Rilbong Point, ki la ïoh bat da ki phew tylli ki kali jong ki riewpaidbah kiba pynkheiñ ïa ka hukum da kaba tah plastik rong iong ïa ka iit jingkhang kali ha kaba la pynieng sharud surok bad la tar ruh hakhmat jong ki trai kali.
Ha kane ka sngi, la sakhi ruh ba ki Pulit ki la bat ïa ki thuk thuk ar shaka ban tohkit la ki biang neem ki kot ki sla.
Kum ban shu pynkynmaw, u Superintendent of Police ka East Khasi Hills District u Bah Sylvester Nongtnger ha ka Lah Sngi u Blei, u la pyntip ba la lap ba bunsien ki thuk thuk ar shaka ki ïaid na ka liang ka diang bad ka buh jingma ïa kiwei pat ki nongleit nongwan khamtam eh ïa ki nongshong kali kiba hiar na ki kali kaba lah ban lam sha ka jingjia aksiden kaba pynïap briew.
Halor kine ki jingjia, ka Shillong Traffic Police (STP) ka kyrpad ïa baroh ban bud ryntih ïa ki kyndon pynïaid kali haba don ha surok bad ban bat ruh ïa ka akor ñiah kali.
U SP u la pyntip ba ki don ki thuk thuk ar shaka bad ki kali saw shaka kiba la teh da ki ktang pait kiba pynmih ïa ka jingsawa kaba jam haba ïaid ha sor khamtam ha ka por shiteng synnia kaba pynthud ïa ka thiah ka dem jong ki riewtymmen, ïa kiba don jingshitom, ïa ki khynnah bad ïa ki briew kiba donkam ïa ka jingkynjah.
Nalor kata, wat hadien ba ladep ban kyrpad na ka por sha ka por la ïohi ba ka don ka jingtah ïa ki phlim rong ïong, pyndait flash light bad teh siren ha ki kali kaba long kum ka jingpynkheiñ ïa ki kyndon ñiah kali.
U SP u la kyntu ïa ki nongñiah kali ba kin kiar na ki jingpynkheiñ aiñ katkum ba la kdew haneng khnang ban pynthikna ïa ka jingshngaiñ ha surok bad ka jingshngaiñ jong ki nongshong shnong ka nongbah Shillong bad kiwei kiwei kiba wan jngoh ïa ka nongbah.
“Ïa kiba pynkheiñ yn pynshitom katkum ka kyndon jong ka aiñ,” la maham u SP.
