Nongpoh, Risaw, 27: Ban tehlakam ïa ki thuk tuk ar shaka kiba ju pynkheiñ ïa ki kyndon aiñ ka tnad Pulit lyngba ka Nongpoh Traffic Branch ha ka sngi u Blei ka la talasi bad pan ïa ki kot ki sla na ka bynta ban tehlakam ïa ki thuk thuk ar shaka kiba pynkheiñ aiñ.
Ïa kane ka jingkhynra thuk thuk ar shaka la pynlong ha sor Nongpoh ba la ïalam da u Offcer In-charge ka tnad Traffic Brnach u Rubul Ali ryngkat ka jingsynran lang jong ki Pulit kiba ïarap na ka bynta ban bat ïa ki thuk thuk ar shaka kiba pynkheiñ aiñ.
Kum ban pynkynmaw, kane ka jingkhynra kot khynra sla ïa ki thuk thuk ar shaka la ju pynlong na ka por sha ka por da ka tnat Puit khnang ban pynsngewthuh halor ka jingma ba bunsien ki ju mih ki jingjia ba sngewsih tang na ka daw ka jingbym bud ïa ki kyndon ba la buh da ka Sorkar.
Haba kren sha ki lad pathai khubor, u Officer in-charge jong ka Nongpoh Traffic Branch u Rubul Ali, u la ong ba kane bat ïa ki thuk thuk ar shaka ka long namarba bun ki nongñiah thuk thuk ar shaka kim bud satia ïa ki kyndon aiñ,
U la ïathuh ruh kane ka jingpynlong ïa kane ka jingtehlakam ïa kine ki Kali ar shaka, ka long ban pynsngewthuh halor ka jingdonkam ban bud ïa ki kyndon khamtam ban kup ïa ki Helmet naduh u nongñiah bad ruh kiba shong hadien khnang ba kan ym mih kano kano ka jingjia ba sngewsih.
U la ong ruh nalor ka jingtehlakam ba ki nongñiah ki dei ban kup ïa ki Helmet ki dei ruh ban pynbiang ïa ki kot ki sla bad kito kiba ym bud ïa ki kyndon ki shah pyngngat katkum ki kyndon jong ka aiñ.
Shuh shuh, u la bynrap ruh ba ka tnad Pulit ka la kyrpad ïa ki nongñiah Kali ar shaka bad wat kiwei ruh ba ki dei ban ïatrei lang da kaba kin bud ryntih ïa ki kyndon khnang ba kane kan long ka jingshngaiñ ïa ki bad ïa ki paidbah ba kan ym mih kano kano ka jingjia ba sngewsih kumba la jia na ka por sha ka por tang na ka daw ka jingpynkheiñ ïa ki kyndon ñiah Kali.
