Bat ki BSF 8 ngut ki nong Bangladeshi ba thmu rungtuh sha u pud u sam ka ri India

Shillong, Risaw 14: Lyngba ki jingïoh jingtip kiba thikna, ha ka 12 tarik mynta u bnai, ki shipai BSF napoh ka BOP, Chikenbari (SWKH) ki la ïoh bat ïa 8 ngut ki nong Bangladeshi kiba la ithuh kyrteng da ka Firoza ba la 43 snem ka rta, ka Sapna Pravin ba la 27 snem ka rta, ka Tanzilla Khatun kaba la 36 snem ka rta, ka Bharna Begum ba la 23 snem ka rta, ka Tony Vimal Das ba la 40 snem ka rta bad 3 ngut ki khynnah ba dang rit.
Ka jingïoh bat ki BSF ïa kine ki nong Bangladeshi ka dei halor ka jingpyrshang jong ki ban rungtuh bad jam shapoh u pud u sam ka ri India kaba dang hab hapoh ka BOP Chikenbari.
Ha kawei pat ka liang, ha ka jingïalang kaba la long ha ka 13 tarik, hapdeng ki shipai BSF bad BGB, ki BSF ki la aiti noh ïa kitei ki nong Bangladeshi sha ki shipai BGB. Ha kajuh ka por ki shipai BSF ki la ïathuh ruh ba ki la ïoh ban pynsangeh ïa kawei ka kali Maruti Ertiga kaba don u nombar AS-01TC-2939 ba la ñiah da u Rajiv Baruah ba la 32 snem ka rta bad uwei pat u nongñiah ba ïarap lang u Sunil Kumar Das ba la 25 snem ka rta, bad ïa katei ka kali, la ïathuh ruh ba la thmu ban pyndonkam da kitei ki briew kiba la shah bat noh ha ki BSF.