Shillong, Nailar 11: Ka KSU Laban Circle ha ka kylla step jong ka 10 tarik Nailar ha ka por 1 baje mynstep ka la ioh bat ïa 2 ngut ki briew kiba dei ki Muslim na Oxford Hills kaba hap hapoh Dorbar Shnong Kenches Trace Oxford Rilbong. Hadien ka jingtohkit ïa ki kot ki sla lah lap ba kine ki briew kim shym la don kano kano ki kot ki sla ban pynithuh ïalade bad lah wan ïalam ïa ki ban trei bylla ha kawei ka ïing kaba don ha Oxford.
Ynda la khynra ïa kata ka ïing la lap sa 4 ngut ki Muslim ki bym don kot don sla. Kine ki briew ki ïoh rung sha Meghalaya da kaba ki wan da ki kali tourist bad pynithuh ïalade ba ki dei ki nong wan Jngoh kai bad ha ka jingtohkit ka Seng ka lah lap ba ki dei ki poi ei kiba wad jaka rieh shane ha ka kam bylla bad ki ïoh jingïarap lyngba uwei u briew uba kyrteng Shajahan Ali uba dei na Assam bad ba sah ha Laban uba pynbiang jaka trei ïa kine ki briew.
Ïa kitei ki 6 ngut la aiti noh sha ki pulit ka Rilbong Beat House ha kato ka kylla step. Ka Seng ha ka 11 tarik Nailar, mynne ka step ka la leit kyndang ïa ka ïingsah jong une u briew (Shajahan Ali) bad beh krad syndon ïa u. Une u kam ïalade ba u dei u kontraktor bad uba ju mlien ban wanrah ïa kine ki briew nabar jylla bad lehse ki lah ruh ban dei ki nong Bangladesh. Ka Seng ka la maham ruh ïa u trai ïing ba ai wai ïa une u briew ba ym bit ban ai ïing wai sha ki briew kiba wan nabar jylla khamtam ki Muslim namar ba dang kyndang ka Sorkar Assam ïa ki Muslim sha Assam bad ka jinglong jingman ha Bangladesh, ki Muslim ki dang phet wir bad ki ïaleh ban rung sha ka jylla Meghalaya.
Ka Seng ka lap ruh ba bun na kine ki Muslim ba sah ha Laban ki ju ïarap para Muslim ban ai jaka sah, khlem pyntip ïa ki bor shnong. Halor kane ka Seng ka la ïakren ruh bad ki bor Shnong bad na ka liang ka Dorbar Shnong Laban mynta ki dang pynlong ïa ka jinglong survey ban tip ïa ki Muslim ba shong ba sah ha Laban.
Ka Seng lyngba kane ka kyrwoh ka maham tyngeh ïa ki nong shong shnong ka thaiñ Laban baroh kawei ba kim bit ban pynshong pynsah bad pynbuhai shnong ïa ki para Muslim ba wan na bar jylla ha Laban bad ki trai ïing ki dei ban shimkhia halor kane ka bynta. Lada lap, ka Seng kan shim ïa ka sienjam kaba tyngeh pyrshah ïa ki trai ïing bad kine ki briew kiba ai jaka sah ïa kum kine ki Muslim ba poi ei hapoh ka Shnong ka thaw bad ka bri Hynñiewtrep, ong ka kyrwoh ba la phah da u Franky Rani Information & Publicity Secretary KSU Laban Circle.
