Shillong, Nailur 02: Ka KSU Nongmensong Unit hapoh ka jingïalam jong u Samla Pynshngain Kupar Lyngkhoi Assistant Organising Secretary, nangta u Pyntngen Kharjana bad ki dkhot jong ka, ki la ïoh ban bat ïa kawei ka kali kaba kit ïa ki bar jylla.
Na ka liang ka seng ka la lap ruh ba kine ki bar jylla kidei ki bym don ïa ki kot ki sla kiba biang.
Na ka liang jong ka KSU ka la ïathuh ruh ba kine ki briew kidei kiba la thmu ban leit bylla sha ka thaiñ New Shillong. Ha kaba ïadei bad kane na ka liang jong ka seng ka la beh bad phah phai noh sha ïa ki na ka jaka ba ki wan.
Ha kawei pat ka jingjia na ka liang jong ka KSU Muliang Circle ha kane ka sngi ka la ïoh ban pynphai noh ïa ki bun ngut ki bar jylla kiba la thmu ban leit bylla sha ki thaiñ Nongjri jong ka South West Khasi Hills District bad na ka liang ka seng ka la kylli ïa ki halor ka jingthmu jong ki ha kaba ïadei bad kane jingwan bylla jong ki sha kane ka thaiñ.
