Baroh shi miet sahkut dheng kali ki nongleit nongwan ha surok NH-6 ha Sonapyrdi EJHD

Khliehriat, Nailar 05: Namar ka jingther jur u slap, ka khydew ktieh bad ki maw ki la hap biang sha surok hajan ka tunel ha Sonapyrdi bad kane ka la jia hynnin ka miet ha ka por kumba 10 baje mynmiet bad ïa ka surok la lah ban pynkhuid haduh mynne myn step ha ka por kumba 8 baje mynstep, namar kane ka jinghap khyndew ktieh bad maw ka la don ka jingdheng kali bun kynta ha kaba ki nongleit nongwan ki la sahkut ha ka dheng kali ha katei ka thaiñ hynnin baroh shi miet.
Na ka liang ka tnat pulit jong ka East Jaiñtia Hills District, ka kyntu ïa baroh ki nongleit nongwam ba ki dei ban long phikir bad peitngor bha haba ïaid na ka surok national highway 6 khamtam ha ka thaiñ Sonapyrdi.
Kumban shu pynkynmaw biang, ka tnat pulit bad ki bor district jong ka East Jaiñtia Hills District, naduh ki bnai ba la leit ki la dep kyntu ïa ki paidbah kiba leit ba wan kiba ïaid lyngba na ka surok national highway na ka thaiñ Narpuh ba ki dei ban rah lypa ki jingbam, ïa ka um dih khnang ba kan nym buh jingeh ïa ki lada jia ka jingdheng kali ha kano kano ka por, kumjuh ruh la kyntu ïa kiba ñiah kali ba ki dei ban niah suki suki ïa ki kali ym dei ban pynher stet than.