Shillong, Jylliew 04 : U MLA ka BJP na Shillong South ba dei ruh u Myntri ka tnad Arts and Culture ka sorkar jylla, Bah Sanbor Shullai u la ong ba ka dewbilat ba pyntrei mynta ha Meghalaya kam ïadei met satia namar kat kaba shna shu hap beit.
Kumta halor kane, u la ong ba la donkam ban bujli noh da kawei pat ka jaid dewbilat kata da kaba ailad noh ïa ka BJP ban synshar ïa ka jylla khnang ba kan ym don shuh kano kano ka jinghap ne jingkhyllem.
Katei ka jingkren u Bah Sanbor kadei halor ka jingsakhi ka jong u ïa ka jingkhyllem jong ka Dome jong ka Iingdorbar Thawain ka jylla, ka jingpei um ha Inter State Bus Terminus bad ka jingjulor jong ka surok Mawlai Bypass.
“Kat kaba shna shu hap bad shu khyllem beit, lehse ka dewbilat Meghalaya kam ïadei met, kumta ngi dei ban bujli noh ïa ka dewbilat (sorkar) bad dei ban ailad beit noh ïa ka BJP ban thaw ïa ka sorkar khnang ba kin ym hap shuh,” u la ong haba kren bad ki lad pathai khubor.
Nalorkata, u ong ruh ban lait na kine kiei kiei baroh, ki paidbah kim dei satia ban leit kyrshan ïa ki Team A, Team B ne Team C kiba hap ban leit kylla sha ka BJP hynrei ki paidbah ki la dei ban ai jingkyrshan markhmat beit ïa ka BJP khnang ba kan ïoh ban thaw ïa ka sorkar kaba pura bad baroh ka jingkwah jong ki samla, ka jingïakhih ki nonghikai bym ïoh tulop yn sa lah ban pynbeit lut.
U Bah Sanbor u la ong ruh ba kiwei kiwei ki jylla ha thaiñ shatei lam mihngi kiba synshar ka BJP kila ïoh ïa ki Medical College, ki Engineering College bad kiwei kiwei ki College, nangta ki lynti ki syngkien bad ka roi ka par bad ki la ïoh ïa ka dud ka ngap na ka sorkar BJP.
Haba kren pat halor ka jingkynthoh jong u MLA ka BJP na Pynthorumkhrah, Bah AL Hek pyrshah ïa ka rukom treikam jong ka sorkar, na ka liang u Bah Sanbor u la ong, “Ngam lah ban sngewthuh balei u Bah Hek u leh kumne watla u dei uba la ih bha ha ka kam, ha ka por ba u Bah Hek u la long kum u Myntri Sorkar, phin ïohi haba don kano kano ruh un shu sngap jar beit, kumta ki paidbah kidei ban sngewthuh. Nga kyrpad ruh ïa u Bah Hek ne Bah Mawrie (President BJP Meghalaya) ba nangne shakhmat ym dei shuh ban ai kino kino ki jingkynthoh khlem da ïasyllok shwa bad nga. Namar ym dei tang u Bah Hek na ka seng BJP, nga ruh nga dei na ka BJP kynthup lang ïa baroh ki dkhot bad ki nongkyrshan ka BJP” ong u Bah Sanbor.
U la ong, u ïahap ïa ka jingkren u President ka NPP Meghalaya u Dr WR Kharlukhi ba lada jïa ba kim sngewtynnadkidei ban iehnoh ïa ka kam kaba ki bat bad ym dei ban weng pat ïa ka jingkyrshan na ka sorkar tad haduh ba ngin da ïoh shwa ïa ka jingbthah na ki nongïalam ka BJP na Delhi.
“Ki nongïalam ka BJP na Delhi kila khot ïa nga bad ïa u Bah Hek ban soi ïa ka jingthoh ban ai jingkyrshan ïa ka sorkar MDA haka jylla, kumta ka jingbthah ruh kadei ban wan hi na kitei ki nongïalam, la nga dei ban weng noh ïa ka jingkyrshan ne ban hiar shuki noh kum u Myntri bad ngan kohnguh beit ïa ka jingbthah ka jongki” ong u Bah Sanbor.
