Shillong, Jylliew, 07: U Myntri Rangbah ka Jylla u Conrad Kongkal Sangma ha ka sngi Baar u la ïathuh ba baroh ki kharkhana saiñ rnga dewïong (Coke Factory) kiba don hapoh ka jylla Meghalaya ki la shah khang dam.
U Myntri Rangbah u la pynpaw ïa kane haba kyntait halor ka jingkynnoh ba ki dang don ki karkhana saiñ rnga dewïong beaiñ kiba dang tyreikam.
Haba kyntait ïa kane ka jingkynnoh, u Myntri Rangbah u la ong, “ïa mynta hapoh ka jylla Meghalaya, la ki dei ki Coke Factory kiba la shu tei be-aiñ la bthah ban khang khyrdep namarkata, ki la shah khang dam.”
“Tang kito kiba don ïa ki kot ki sla kiba biang, naduh ka Environmental Clearance, la ailad ba kin treikam,” la bynrap u Conrad Sangma.
Shuh shuh u Myntri Rangbah u la ong, “namarkata, nga kwah ban pynshai ba ym don shuh ki karkhana saiñ rnga dewïong beaiñ kiba dang treikam (ha Meghalaya).
Ka Judicial Committee ba la thung da ka Iingbishar Meghalaya High Court ha ka Lah Sngi u Blei ka la bthah ïa ka Sorkar Jylla ba ka dei ban khang khyrdep ïa baroh ki karkhana saiñ rnga dewïong hapoh ka Jylla.
Kane ka Judicial Committee ba la khlieh da u Justice (retd) BP Katakey ka la lum jingïalang ban lum ïa ki jingtip bad ïa ki jubab na ka Sorkar hadien ba u la bthah ïa ka Sorkar ba ka dei ban pynthikna ha kaba pyntreikam ïa ki kyndon jong ka Supreme Court bad ka National Green Tribunal (NGT) kaba khang ban tih bad shalan be-aiñ ïa u dewïong.
“Nga la bthah ïa ka Sorkar Jylla ba kan pynsangeh mardor ïa ka jingtreikam jong ki Karkhana saiñ rnga dewïong be-aiñ namarba u dewïong ba la pyndonkam ha ki Karkhana Coke u dei uba wan lyngba ka jingtih beaiñ ïa udieiwong,” u la ong.
Kane ka Committee ka la pyntip ruh ba ki don kumba 80 tylli ki Coke Plant hapoh ka Jylla Meghalaya.
