Baroh ki Census Town kynthup kin kynthup noh ha ka JJM ban ïoh pahuh umdih, ong u CM
Shillong, Jylliew 27 : U Myntri Rangbah ka jylla, Conrad K Sangma ha ka sngi Nyngkong u la pynbna ba baroh ki jaka ba hap ha ka Census Town kynthup naduh ka Umlyngka, Nongkseh bad kiwei kiwei kin hap noh ha ka Jal Jeevan Mission (JJM).
“Hadien ka jingïatai kaba bniah, ngi la shim ïa ka rai ba ngin pynsngew sha ka sorkar India ba kan shah noh ïa ki jaka bym hap ha ka Municipal kynthup ïa ki census towns ba kin shah kynthup lang ha ka JJM. Kumta ha ka taiew ba la dep, nga la kynduh ïa u Myntri ka Jal Shakti, u Gajendra Singh bad nga sngewkmen ruh ban pyntip ba ym dei shuh tang ha Umlyngka hynrei baroh ki census town kiba khlem shah kynthup mynshwa ha ka JJM mynta kin ïoh lang,” u la ong haba kren ha ka jingïalang plie ïa ka Milk Collection Centre ha Umlyngka.
Katei ka jingpynbna u Myntri Rangbah kadei hadien ba u Myntri ka tnad C&RD ba dei ruh u MLA ka thaiñ Bah Hamlet Dohling u la kyrpad ïa u Myntri Rangbah ban pynïoh lang ïa ka skim JJM sha ka shnong Umlyngka, Nongkseh bad ruh ha Lawsohtun namar baroh shi katta kim shym la ïoh satia namar ki hap ha ka Census Town.
Nalorkane, u Myntri Rangbah u la ïathuh ruh ba u la dep ruh ban shong ïa ka jingïalang bad ka tnad PHE jong ka sorkar jylla bad kumta u la ïoh ban lum thup ïa ki jaka bym dei Municipal kiba khlem shah kynthup ha ka JJM. Katkum ka jingong jong u, ki don haduh kumba 20 tylli ei ei ki shnong kiba don shabar jong katei ka skim.
Shwa kane, u Myntri Rangbah u la ïathuh ba ka sorkar jylla ka la dep ban tyrwa haduh 12-13 klur tyngka hapoh ka NABARD Infrastructure Development Assistance (NIDA), kaba dei ka skim hapoh ka National Bank for Agriculture and Rural Development (NABARD).
Hynrei u la ong ba katei ka skim kam shym la ïaid kumba ki khmih lynti na ka daw ki katto katne ki kyndon jong ka Finance Ministry kaba la kynduh jingeh ban ïoh ïa ka Umlyngka Water Supply Scheme hapoh ka NIDA.
Shwa kane, u MLA ka thain u la ong ba ha Mylliem constituency nalor ka Lawsohtun, ka Umlyngka ka dei ka shnong kaba bun briew tam namar ki don haduh kumba 13,000 ngut ki nongshong shnong hynrei ka jingeh kaba ki paidbah haduh mynta mynne ki ud kadei ka jingkyrduh um.