Banjur u Myntri Rangbah ïa ka jingdonkam ka jinglong ba shngaiñ jong ki khynnah ha jylla

Shillong, Risaw 13: Ka Tnad Social Welfare ka Sorkar Jylla ha ka sngi nyngkong ka la rakhe ïa ka sngi ki khynnah kynthei ne ka International Day of the Girl Child 2025 ha kaba ka phang pdeng ka long, “Ka Khynnah Kynthei kaba Nga Long, Ka Jingkylla kaba Nga Ïalam: Ki Kynthei kiba don ha khmat eh jong ki jingeh,” ha kaba ïa kane ka jingrakhe la pynlong ha ha Lariti Auditorium, Mawkasiang, kaba pynpaw ïa ka jingjop, ka jinglah ban ïai shah bad ka jinglah jong ki khynnah kynthei na kylleng ki jaka jong ka jylla.
Ha kane ka jingrakhe la ïadonlang u Myntri Rangbah ka Jylla Conrad K Sangma kum u kongsan, u Bah Paul Lyngdoh, Nongaibuit ka Tnad Social Welfare kum u symbud kongsan bad kiwei kiwei.
Haba ai jingkren, u Myntri Rangbah ula pynpaw ka jingsngewnguh ïa ka Tnad Social Welfare bad ruh ïa ka jingkongsan jong ka jingïatreilang kum ka kynhun ha ka ban ïoh ïa ka jingkiew kaba don jingmut. Ula ïalam ruh ïa ki nongïashim bynta ha ka jingsngap jar ba ar minit kum ka jingpyndon burom ïa ki jingim jong ki khynnah kiba ïap ha ki jingjia ba dangshen, haba pynkynmaw ïa baroh ïa ka jinglong synjor ka jingim bad ka jingdonkam ban peitngor bad ban ïada.
Haba phai sha ki khynnah pule, ula ban jur ba kane ka jingrakhe ka dei ban dei ka jingsdang jong ka jingkylla ha ka imlang sahlang ha ka ban ai jingkyrshan ïa ki khynnah kynthei. Ula kren ïa ki sienjam kum ka jingpynkha ïa ka Reusable Sanitary Pad Unit ba la bei tyngka da ka Chief Minister’s Special Development Fund bad ba pynmih da ki Self Help Group, kaba kyntien ïa ka jingkupbor ïa ka ïoh ka kot ban eh ha ka thaiñ.
Ula kren ruh halor ki sienjam ba thymmai hapoh ka Safe Motherhood Program kynthup ki song sumar ïa ki Kmie na Nongkyndong da kaba ai ïa ki tiar na ka bynta ki Khunlung ba dang kha ba la pynmih da ki Self Help Group. Ula ban jur ïa ka jingkongsan ka jingshngaiñ ki Khynnah, haba kdew ïa ka bynta jong ka technology, ki prokram ha ka imlang sahlang bad ka jingïatreilang bad ki seng treimon sngewbha bad ki seng niam.
Haba phai shaphang ka jingdih drok, u Myntri Rangbah ula kren halor ka jingpynkhlaiñ ïa ki jaka ai jingsumar kum ki detox bad de-addiction centre, ka jingpeitngor ha ka imlang sahlang bad ka jingpyrshang ban tehlakam ïa ka jingwan poi u drok.
Ula pynshlur ruh ïa ki khynnah kynthei ba kin pyrkhat laitluid, ban shim ïa ki rai da ka jingsngewskhem, bat ïa la ka burom, haba kdew ba wat ka jingjied kiba rit ki lah ban don ka jingktah ïa ka hadien habud jong ki.
Ha ka jingïatai bad ïakren, ki samla pule ki la kren shitrhem bad u Myntri Rangbah ka Jylla, da kaba pynpaw ïa ki jingeh bad ki jingai jingmut halor ki mat kiba bun jait. Ki jingïakren ki kynthup ïa ka jingdonkam ban pynbha ïa ka jingbam sngi ha ki skul, ban pynbha ïa ki lad jingïada na ka bynta ki khynnah kynthei, ban wanrah ïa ki jinghikai kumno ban ïada ïalade, bad ban kyrshan kham bun ïa ki nongïalehkai ba dang khynnah bad kiwei kiwei.
Ha kane ka sngi la pynkup burom ruh ïa ki nongjop, haba ai jingithuh kyrpang ïa ki khynnah kynthei kiba pass bha shakhmat ha ki jingpule, kam ïalehkai, ka jingshakri ha ka imlang sahlang, ka sengkam sengjam, ka jingshlur bad ka jinglong nongïalam ha shnong ha thaw.
Ha kane ka jingrakhe la kynthup ruh ïa ka jingkren ai mynsiem da ka samla Daphisha Kharbani, Nongseng ka Majestic Dance Academy bad ka samla Anjelina Tynhlaiang, kaba kadei ka Paralympic athelete, kaba ka khana jong ki kala aimynsiem ïa ki samla pule ba kin bud ïa ki jingangnud jong ki da ka jingsngew skhem bad ka jingshlur.