Banjur u Myntri bording ba donkam ki jingïarap na ka sorkar pdeng halor ki projek bording

Shillong, Rymphang 21: Ka jingïalang kaba 28th North Eastern Regional Power Committee (NERPC) ka la long ha Radisson Blu Guwahati, ha kaba u Myntri ka tnat Bording u A.T. Mondal bad u Commissioner and Secretary Power, ka sorkar Meghalaya u Sanjay Goyal ki la mihkhmat na ka bynta ka jylla ha kane ka jingïalang.
Ha kane ka jingïalang u A.T. Mondal u la ïathuh ruh shaphang ki sienjam ba la shim da ka sorkar Meghalaya ha kaba ïadei bad ki jingthmu jong ka ban kyntiew ïa ki kam bording ha ka jylla. U la ong ruh ha ka forum halor ka jingshna bad ki jingïaid ki kam ka Riangdo Small Hydro Project, ha kaba ïadei bad ka DPR la dep ban pynkhreh na ka bynta ka Myndtu Leshka Stage II project bad na ka bynta ka jingai jingmut ba la ïohpdiang na ki riew shimet ha kaba ïadei bad ki hydro project kiba rit.
U la ïathuh ruh ha ka Committee shaphang ki skhim bad ki jingai jingmut kiba hakhmat ba la aiti da ka jylla hapoh ka PSDF ha kaba ïadei bad ka Transmission, Distribution bad ki Load Despatch center jong ka jylla kiba thmu ban pynbha ïa ka rukom treikam, ka jingsam ïa ka bording bad ka cyber security bad da ka jingkyrpad ruh ba kan dei ban don noh kloi ka jingmang na ka bynta kane.
Haba banjur halor ka jingkongsan jong ka Down Stream infrastructure, u la kyrpad ruh ban pynïoh ka jingmang pisa ïa ki 33 KV sub-station kaba la dep ban aiti ïa ka jingkyrpad da ka MePDCL ha u Nailar snem 2024 ba dei ban pynsted noh ïa ka kam khnang ban pynthikna ba kan ym don ka jingpynslem ïa ka kam kaba ïadei bad ka jingsam ïa ki bording kaba 24X7 sha ki nongshong shnong jong ka Meghalaya.
U Myntri ka tnat Bording u la pan ruh ka jingkyrshan na kiwei pat ki jylla kane ka thaiñ shatei lammihngi ban pynbor ïa ka sorkar pdeng ba kan khmih biang ïa ka Pump Storage Policy khnang ba ki jylla kiba rit kin ïoh ki lad jingïarap bad ki jingmyntoi ha kaba ïadei bad ki project ha ka jylla.
La shim ruh ïa ka rai ba ha kane ka jingïalang ka NERPC kaba 28 ba ka Meghalaya kan ïoh ïa ka jingwan jngoh jong u Chairman jong ka na ka bynta ka snem mang tyngka kaba 2025-26.