Shillong, Jylliew 24: Ka tnat Forest and Environment ka sorkar jylla Meghalaya ha ka jingïatreilang bad ka Network for Certification and Conservation of Forests (NCCF), New Delhi ha ka sngi Nyngkong ka la pynlong ïa ka Workshop on Training on Forest Certification and Carbon Credit kaba lai sngi ha Sylvan House, Lower Lachumiere, Shillong. u Bah D.P. Wahlang, Chief Secretary, Meghalaya u la plie ïa kane ka prokram kum u kongsan ha ka jingïadonlang u A. M Singh, Director General NCCF, u Pravin Bakshi, Commissioner & Secretary, Forest and Environment Department, u B.S Gill, Principal Chief Conservator of Forests & HoFF bad kiwei ki heh ophisar.
Haba kren ha kane ka prokram u Chief Secretary, u Bah D. P. Wahlang, u la banjur halor ka jingdonkam ban tip halor ki kam ban ïada bad ka jingdonkam ban pynneh pynsah ïa ki khlaw. U la pynpaw ïa ka jingdonkam ha ka pyrthei baroh kawei ïa ki khlaw ki btab, wat la ka long ha ka ri ne wat ha ki jylla ki khlaw ki long kiba kongsan bha. U Bah Wahlang u la ïathuh ruh ïa ka jinglong laitluid ba la ai da ka Sorkar Pdeng sha ki jylla ban khmih ban sumar hi ïa ki khlaw, bad kiwei ki jingdonkam ban pynneh pynsah ïa ki.
U la ïathuh ruh ba ka sorkar jylla ka la dep khot ïa bun tylli ki jingïalang ban ïakren halor ki kam pomdieng bad kumjuh ruh ban thung ïa ki dieng hapoh ka jylla.
Ha kane ka Workshop kan don ruh ka Training halor ka Carbon Credit and Forest Certification ha ka 25 bad 26 tarik mynta u bnai.
Ka jingthmu jong kane ka workshop ka long ban pynsngewthuh ïa kiba ïashim bynta shaphang ka Forest Certification, Carbon Credit bad kiwei kiwei, kum ka Ecotourism, Quality Planting Material bad Trees Outside Forest, kiba hab hapoh ka jingpeit ka NCCF.
