Banjur ka RKM ïa ka jinglong kongsan ban pyndonkam bad nang ban kren ïa ka ktien Sanskrit

Shillong, Nailar 24: Ka Ramakrishna Mission Vivekananda Cultural Centre dangshen ka la pynkutnoh ïa ka jingai jinghikai kaba 10 sngi halor ka Sanskrit Sambhashanam Shibiram, ne ka jinghikai ban nang ban kren Sanskrit, ha kaba ha kane ki la wan shim bynta da kiba bun ki riew shimet kiba kwah ban nang ban kren ïa ki ktien kiba naduh hyndai. Ïa kane ka jingai jinghikai la pynlong lang da ka Samskrita Bharati bad ka Ramakrishna Mission Shillong.
Kane ka program ka la sdang ha ka sngi Thohdieng ha ka 5 baje janmiet da kaba tbeh ïa ka sharak, nangta ka Vedic Chanting bad ki jingduwai. Hadien la pynbud da ka pyni ïa ka rukom kren ïa ka ktien Sanskrit da ki samla pule, kaba pyni ruh ïa ka jingiaid shaphrang ki jingpyrshang jong ki ha kine ki 10 sngi ba la dep.
Ha kane ka sngi ba pynkut ïa ka prokram la wan ban long kongsan da u Dr. B.D.R Tiwari, Commissioner and Secretary ka sorkar jylla Meghalaya, uba la pynpaw ka jingkmen halor ka jingïoh jinghikai ki nongïashim bynta kiba kwah ban kren ïa ka ktien Sanskrit tang hapoh ka por kaba lyngkot ha kine ki 10 sngi.
U Dr. Tiwari u la pynpaw ïa ka bynta kaba kongsan jong ka ktien Sanskrit ha ka ban pynwandur ïa ka burom jong ka Bharat, bad u la banjur ruh halor ka jingdonkam ban sngewthuh ïa ki kolshor jong ka ri. U la pynshlur ïa kiba ïa shim bynta ban bteng ban kren ïa ka ktien Sanskrit ha la ki jong ki ïing ki sem, bad ban jur halor ka jingdonkam ban ïaid shakhmat ban pyndonkam ïa kane ka ktien.
Katba ka Srabani Kar Purkayastha, Lecturer ha ka Philosophy na ka Umshyrpi College, haba kren ha ka jingïalang ka la pynpaw ïa ka jingdonkam ka ktien Sanskrit ban pynneh pynsah bad ban pynphriang ïa ka kolshor jong ka ri India. Ka la kdew ruh ba ka ktien Sanskrit ka don ka jingïadei kaba jan bha bad ka ktien kmie ne ka ktien ba kren ha ka ri India baroh kawei bad pynpaw ïa ka jingkwah jong ka ban ïohi ba kum kine ki jingïalang halor ka ktien dei ban ïai pynlong manla ka por ha Shillong ha ki por ban dangwan.
Katba u Swami Vedeshananda Maharaj, ha ka jingkren, u la ïathuh ba bun na ki jylla ha India ki dei kiba pyndonkam ïa ka ktien Sanskrit, bad pynpaw ïa ka jinglong kongsan kane ka ktien ban sngewthuh ïa ka jinghiar pateng bad ka longshwa manshwa jong ka ri. Na ka liang u Dr. Buddhadeb Purkayastha, uba hikai ha kine ki sngi u la pynshlur ïa ki samla pule ban bteng ban pule bad tip ïa ka ktien Sanskrit ha ki jingïaid lynti jong ki ha ka pule puthi.
Ïa ka prokram la pynkut da ki kyntien ai khublei bad ka jingpule ïa ka Shanti Mantra, kaba pynpaw ïa ka jingjop jong ka jingpynlong ïa kane ka prokram hikai kren Sanskrit kaba 10 sngi.
Kane ka prokram ba la pynlong, ka thmu ban thaw ki lad ki lynti ban pyndonkam ïa ka ktien Sanskrit hapdeng ki paidbah, ka pynlah ruh ïa kiba ïashim bynta ban ïakren ha ka Sanskrit ha ki jingim jong ki, kiba manla ka sngi. Lyngba kane ka jingsdang, kiba pynlong ïa kane ka prokram ki kyrmen ban kyntiew bad ai burom ïa ka ktien Sanskrit bad ka kolshor.