Banjur ka NEHU ïa ka jingpynkupbor ïa ki longkmie ha ka sngi rakhe sngikha u Dr. Mahtab

Shillong, Risaw 21: Ka North-Eastern Hill University (NEHU) dangshen ka la rakhe ïa ka sngikha ba 125 jong u Dr. Harekrushna Mahtab, u nongïakhun laitluid uba la pawkhmat, u riew saiñ pyrthei bad uba shemphang ha ka thoh ka pule.
Ha kane ka sngi la ïoh ka jingkren na u Prof. Ashwani Kumar na ka Tata Institute of Social Sciences (TISS), Mumbai, halor ka phang, “Grassroots Governance and the Rise of Maternal Welfare in India.”
Ha ka jingpyrkhat jong u, u Prof. Kumar u la ngam jylliew halor ka kam synshar khaddar, ka jinglong kynthei shynrang, bad ka bha ka miat ka imlang sahlang, bad kiwei kiwei. U la sdang ruh da kaba bunjur halor ka jinglong kongsan ka jinglong kaba sngewrit bad kiwei ki jinglong. Haba quote ïa u nongthoh poitri bad u Nobel laureate u Octavio Paz, u la ong, “Ha kane ka por jong ngi, haba ka pyrthei ka long kaba tlot bad ka longbriew manbriew ka mad ïa ki jingeh, imat kan khambha ba ngin tip ïa ki jingeh bad ban ai khublei pat ïa kito kiba noh synniang kylluid mynsiem ban pynlong ïa ka jingim kaba itynnad bad kaba ai jingmyntoi.”
U Prof. Kumar u la banjur ruh halor ka jinglong kongsan ka jingpynkupbor ïa ki longkmie. U la ïathuh ruh ïa ki program kum ka Subhadra Yojana, Janani Suraksha Yojana (JSY), bad Mission Shakti ha Odisha kiba ka rukom treikam ka long ban wanrah ia ka jingbishar hok bad ka jingïaryngkat.
U la kdew ruh ba ka jingbhah shuki na ka bynta ki longkmie ha ki Panchayati Raj Institution (PRIs) ka la long ka kam kaba la wanrah ka jingkylla haba ïadei bad ka bha ka miat jong ki longkmie. Ki program kum ka MGNREGA, ka ailad kumba 1 bynta na ka 3 bynta (one-third) ka jingïashim bynta ki longkmie, ha kaba kane ka la kyntiew ïa ka ïoh ka kot bad ka bor ban shim ïa ka rai, bad kaba la aibor shuh shuh ïa ki longkmie ban don bynta ha ka jingpynwandur ïa ki kam pynroi ha ki shnong ki thaw.
Haba phai sha ka jylla Meghalaya u Prof. Kumar u la kdew halor ka jingplie ïa ka “She-Rise” ha Laitkroh, East Khasi Hills, kaba la shna ïa ki sanitary pad kiba lah ban pyndonkam biang bad kiwei kiwei ki jait sengkam lajong.
U nongpynïaid ïa ka prokram u Prof. Sumarbin Umdor, Pro-Vice-Chancellor ka NEHU, u la pynpaw ka jingai khublei ïa u Prof. Ashwani Kumar halor ki jingkren kiba ai mynsiem bad myntoi bad kumjuh ruh ïa ki kam jong u Dr. Mahtab. U Prof. Umdor haba phai sha ka jylla Meghalaya, khamtam halor ka jingkylla ka ïoh ka kot ha ka imlang sahlang u la batai ruh halor ka jingkhang jong ka Supreme Court ïa ka jingpom dieng ha ki snem 1990, ha kaba kane ka la ktah ïa ka ïoh ka kot ka kamai kajih kiba sah ha ki thaiñ nongkyndong. Kumta ka jingpyrshang jong ki longkmie ban leh noh da kiwei ki kam ka la wanrah biang ïa ka roi ka san bad kumjuh ruh ka jingïohkam ïohjam.
La pynkut ïa ka prokram da ka panel discussion, ba la pynïaid da u Bhagirathi Panda, ha ka jingdonlang ki nongtrei jong ka NEHU.