Ban ym pynkheiñ ïa ki kyndon ka aiñ, dei ban weng noh ka jingpynlong public hearing : KSU

Shillong, Nohprah 15: Ka Khasi Student’s Union East Jaiñtia Hills District Unit ha ka jingïakynduh bad u Chairman ka Meghalaya State Pollution Control Board (MSPCB) ka la aiti ïa ka dorkhas ha kaba ïadei bad ka jingthmu ban pynlong ïa ka jingïalang paidbah ne ka public hearing kaba dei ban long ha ka 19 tarik mynta u bnai.
Ha ka dorkhas ba ka la aiti sha u Member Secretary ka MSPCB ka la kyrpad bad dei ban wengnoh ïa kane ka jingpynbna paidbah ban pynlong ïa ka jingïalang ne ka jingbishar paidbah. Na ka liang ka seng ka la pynpaw ruh ka jingsngewkhia kaba lah ban ktah ïa ka shongsuk shongsaiñ bad ka jingshngaiñ jong ka jylla kaba lah ban mih beit na ka jingpynbna paidbah No. MPCB/TB- 360/20205/SCL/EJHD/2025-26/ kaba 18 tarik u Naiwieng 2025, kaba ïadei bad ka jingïalang bishar paidbah (Public Hearing) kaba la buh ban pynlong ha ka 19 tarik mynta u bnai 2025, ba la pynmih da ka Meghalaya State Pollution Control Board (MSPCB).
Ka seng ka ong ba katei ka jingpynbna la pynmih halor ka nongrim jong ka jingbakla bad kaba ïalam bakla ïa ki jingshisha, ha kaba ka la pynkheiñ ïa ki kyndon ba kongsan jong ka Environment Impact Assessment Notification, 2006 bad kaba don ka jingïadei bad ka Meghalaya Land Transfer Act, 1972.
Ka seng ka pyntip ruh ba ka jingïamynjur ïa ka jingïadie jaka kaba 6 tarik u Risaw, 2025 la pynïaid hapdeng u Bah Syrpaibha Sukhlain bad ka SHREE CEMENT LIMITED, lyngba ka jingsoi ba la aibor da u Bharat Sharma, na ka bynta ban aiti ïa ka jingdon jingem jong ka khyndew kaba don ha Khar Siang Lum Pyrshim, Daistong, Elaka Nongkhlieh, East Jaiñtia Hills District, na ka bynta ka jingthmu ban seng ïa ka karkhana dewbilat. Kane ka jingaiti jaka ka la long kaba sngewkhia naba la aiti ïa ka jaka ne khyndew na u riewlum sha u bar jylla.
Ka seng ka ong ruh ba kane ka jaka ka hab beit sawdong hapoh u pud u sam ka jylla Meghalaya bad kaba la pynïaid da ka Meghalaya Land Transfer Act, 1972. Section 3(1) jong ka Act kaba khang ïa ka jingïadie jaka hapdeng u riewlum bad u bar jylla. Shuh shuh ka long ruh kaba kongsan ban pyntip ba ka bor ba la pynkhamti hapoh ka Act ka dei ïa u ne ka Deputy Commissioner (DC) jong ka district ha kaba kam shym la don kano kano ka jingai jingbit ban aiti ïa ka jaka naba ka hab hapoh ka Section 2(d) jong ka Act.
Kumta halor kine baroh ka paw shai ba ka don ka jingdkoh haba ïadei bad ka aiñ haba pynkhreh na ka bynta ban pynlong ïa ka jingïalang bishar paidbah (Public Hearing). Ka jingpynïaid shakhmat ïa kane ka Public Hearing ym tang ba ka pynkheiñ ïa ka Meghalaya Land Transfer Act, 1972, hynrei kan pynkheiñ ruh ïa ki lad jingïada kiba la don hapoh ka riti synshar ka ri kiba la ohshrong hapoh ka khyrnit kaba 6 ka riti synshar ka ri India.
“Kumta halor kitei ki kam ba la kdew kiba ïaid lang katkum ka jingpynskhem jong ka aiñ bad ki kyndon la sngewthuh ba kan don ka jingpynkheiñ ïa ki kyndon, kumta ngi kyrpad ba phin pynsangeh noh ïa ka jingthmu ban pynlong ïa kane ka jingpynbna ban pynlong ïa ka jingïalang bishar paidbah kaba la thmu ban pynlong ha Daistong, Elaka Nongkhlieh, East Jaiñtia Hills District khnang ba kan pynthikna ba kan ïaid lang bad ki kyndon ka Meghalaya Land Transfer Act, 1972 bad ka Environment Impact Assessment Notification, 2006,” ong u samla Streamly N Suchen bad Kwilnis Suchiang President bad General Secretary ka KSU EJHDU.