Shillong, Nailar, 13: Ka sorkar Meghalaya ka la pynsngew ha ka tnad Kam Pohiing ka Sorkar Pdeng ban shimkhia bad ka Sorkar Bangladesh da kaba kyrpad ban ailad noh ïa ka jingtei ïa ki jingker sainar ha khappud bad ka ri Bangladesh.
Kane kan ïada ïa ki shnong kiba don ha shilynter kaba jrong 40 kilomitar bym pat ker khlem da iehnoh ïa ki sharba na ka jingker sainar.
Katkum ki aiñ jong ka pyrthei ha kaba ïadei bad ka jingker jingïada ïa ka khappud ka dei ban jngai 150 yard shapoh ka jaka jong ka ri. Hynrei ka jinglong jingman jong ka jylla Meghalaya, ka la pynlong ïa ki katto katne ki shnong ban hap shapoh ki jaka ba la tip, “no man’s land” ne shabar jong ka jingker, kaba pynsngewkhia ïa ka jingshngaiñ bad ka jingïada jong ki.
“Ngi la pynsngew sha ka MHA (da kaba kyntu ïa ka) ban pynkohnguh ïa ka Sorkar Bangladesh ban ker sainar najan u mawpud khnang ba ngin dup lah ban kiar ïa ka jingker sainar shabar jong ka shnong,” ong u Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong haba ïakren bad ki lad pathai khubor hngi Balang.
Katkum ka jingong jong u, kane kan ïarap ban ïada ïa ki shnong khlem da buh ïa ki ha ka jingma.
U la pyntip ba ki don katto katne tylli ki shnong kiba don ha shilynter ka jingjrong kaba 40 kilometre bym pat ker sainar ki ban hap shabar ka jingker sainar ynda la sdang shna ïa ka jingker sainar kum ki kyndon aiñ jong ka pyrthei.
