Nongpoh, Risaw 02: Ki samla pule Khasi jong ka Regional Institute of Science and Technology (RIST) bad University of Science and Technology, Meghalaya, (USTM) mynta ka sngi kila pynlong ïa ka jingïakynduh lang (Fresher’s Meet) na ka bynta ban wanrah ka jingïatylli bad ithuh ithaw para samla Khasi kum shipara kiba dang wan pule thymmai ha katei ka skulbah.
Ha katei ka jingkynduh lang bun naki samla Khasi kiba leit pule ha katei ka skulbah kila poi ha katei ka sngi, la sakhi ruh da ka jingdon lang ki nongïalam ka KSU North Khasi Hills District, naduh u Samla Ferdinald Kharkamni, Samla James Hitler Mawphñiang General secretary, bad kiwei kiwei ki nongïalam naka district, ki circle bad ki unit bapher bapher.
Nalor katei ka jingkynduh lang jong ki samla pule katei ka skulbah, ha katei ka sngi naka liang ka KSU North Khasi Hills District kala ïoh ruh ban pynskhem ïaki nongïalam ba thymmai jong ka KSU RIST-USTM Unit naka bynta ka samoi treikam jong u snem 2024-25, kaba dei ruh ka unit kaba peit kyrpang ïaka bha ka miat bad ka eh ka shon jong ki samla pule ha katei ka skulbah bad kum ki samla Khasi kim dei ban mad kano kano ka jingeh bad ka jingshah thombor, hynrei ba kin leit ban wad jingstad hapdeng ka jingkmen bad ka jingsuk jingsaiñ.
Ha katei ka sngi kum ka jingsngewnguh bad burom ïaki nongïalam barim, naka liang ka KSU RIST-USTM Unit kala ai sngewbha ruh da ki momentous halor ka jingshakri jong ki haka seng ha katei ka skulbah bad la pynphuh pynphieng ruh ha katei ka sngi da ki jingshad, jingrwai bad ka jingpyni riam bala shim bynta da ki samla pule khasi ba thymmai ha katei ka skulbah.
Ki nongialam ba thymmai ka KSU RIST-USTM Unit jong ka samoi treikam u snem 2024-25, ki kynthup ïa u samla Balasumar Sohkhwai kum u Adviser, u samla Richie C Lyngkhoi kum u President, u samla Sdangmi Lhuid kum u Vice- President General, u samla Shootingstar Thangkhiew kum u General Secretary, ka Samla Larihunshisha S. Myrthong Asst. General Secretary lem bad kiwei kiwei ki nongkitkam.
