Shillong, Nailar 24 : Ban wanrah ka jingkylla ha ka koit ka khiah hapoh ka jylla u Myntri ka tnad ka koit ka khiah u James P.K Sangma mynta ka sngi ula plie ïa ka ophis jongka Meghalaya Health System Strengthening Project (MHSSP) ha ophis DHS, Laitumkhrah bad ïa kane ka projek la bei pisa da ka World Bank.
Haba kren haka jingïalang kum u konsan u myntri u la ong “ Kane ka projek kan wanrah ïa shibun ki jingkylla ha ka liang ka koit ka khiah . Lyngba ka MHSSP yn don ki jingpynkylla nadong shadong ha ka jingshakri ïaki paidbah ban kyntiew ïa ka koit ka khiah naduh sor shaduh nongkyndong”.
U Myntri u la bishar bniah ruh ïa ki rukom trei ka MHSSP ha ka jingïalang hadien ba la wanrah ïa ka jingpyntip ba lyngkot halor ki rukom treikam da u Project Director ka MHSSP u Ramkumar S IAS. Ka kaiphod ka pyni kiei ki kam, kiba ka MHSSP ka la leh bad kiei ruh kiba kan dang trei nangne shakhmat.
Ha ka jingïalang ba la don lang ki doktor bad ki ophisar jongka tnad ka koit ka khiah kynthup ïa ki DHS, u Myntri u la ai jingmut ba ym dei tang ka MHSSP hynrei dei ban phai khmat ruh ban pynkhlaiñ ka jingshakri ha kiwei kiwei ki bynta jongka tnad ka koit ka khiah da kaba ïatrei lang bad baroh kiba ïadon bynta ha ka ban kyntiew ïa ka koit ka khiah.
U la ïathuh ruh ba ka MHSSP ka la don lypa ka website http://meghssp.org/ bad lyngba kane la buh bniah buh ryntih shaphang kane ka projek khnang ba ki paidbah kin lah ban peit bad ïohi da lade.
U la ai khublei kitbok ïa baroh ka kynhun jongka MHSSP bad u kyrmen ba yn dang lah ban don sa kiwei kiwei ki projek ki ban pynkhlaiñ ïaki jingshakri ka tnad ka koit ka khiah.
Lah ban pynkynmaw ba ïa ka MHSSP la ïasoi ïa ka soskular ha ka 28 tarik u bnai Risaw hapdeng ka sorakr jylla bad ka World Bank bad ka la sdang ban treikam naduh ka 26 tarik Naiwieng 2021 na ka bynta san snem lynter. Ka thong ka long ban pynkhlaiñ ïa ka jingshakari na ka bynta ka koit ka khiah ki paid nongshong shnong ka jylla.
