Ban tyllun shakhmat ka jingïakren ïasuk kyrpad ka HNLC ïa ka Sorkar ban map noh ïa ki mukotduma

Shillong, Jylliew, 24: Ka seng kieng atiar Hynñiewtrep National Liberation Council (HNLC) ha ka sngi Saitjaiñ ka la kyrpad ïa ka Sorkar ba kan weng lut pyrshah ïa ki mukotduma leh kam bymman ba la rejistar pyrshah ïa ki nongïalam bad ïa ki dkhot khnang ban dup lah ban pyntyllun shakhmat ïa ka jingïakren ïasuk.
Ka Seng ka la rah ïa kane ka mat jingdawa ha ka sien shong ïakren ïasuk kaba baar kaba la long bad ki ksiang ba la thung da ka Sorkar Pdeng bad ka Sorkar Jylla.
Ha kane ka jingïalang, la mihkhmat da u ksiang ba la thung da ka Sorkar Jylla u Bah Peter S. Dkhar (Retd IAS) bad u Advisor jong ka Ministry of Home Affairs (MHA) Northeast u AK Mishra (Retd IPS), bad hynñiew ngut ki dkhot jong ka seng HNLC ba kynthup ïa u Vice Chairman u Bah Manbhalang Jyrwa, u Political Secretary u Bah Aristerwell Thongni, u Foreign Secretary u Bah Phrangkupar Diengdoh bad ki PSO ba kynthup ïa u bah Rymphang Marweiñ, Bah Storgy Lyngdoh, Bah Aiborlem Marbangiang bad u Bah Raymond Lapang.
Haba kren sha ki lad pathai khubor, ksiang ba la thung da ka HNLA u Bah Sadon K. Blah uba long ruh u President ka HNYF, u la ong, “ngi la ïathir ïatai mynta ka sngi halor ka jingdonkam ban plie ïa ka jingkhang ïakren ïasuk ka ban tyllun shakhmat bad (ban leh ïa kane) ka Sorkar ka dei ban weng lut ïa baroh ki jingpynngat mukotduma leh kam bymman pyrshah ïa ki nongïalam ka HNLC bad ïa ki dkhot.”
U la ong ba ka seng ka la kyrpad ban map lut ïa baroh ki mukotduma ba la mudui pyrshah ïa ki nongïalam ka seng bad ïa ki dkhot da ka Sorkar Pdeng bad ka Sorkar Jylla.
Ka don tang kawei ka mukotduma ba la rejistar bad ba la pynngat kyndon da ka National Investigation Agency (NIA) pyrshaj ïa ki nongïalam ka Seng kiba kynthup ïa u Chairman u Bah Bobby Marweiñ bad ïa u General Secretary-cum-Publicity Secretary u Bah Saiñkupar Nongtraw.
U Bah Sadon u la pyntip ba ki nongmihkhmat na ka Ministry of Home Affairs (MHA) bad ka Sorkar jylla ki la pynpaw ba kane ka kam kan shimpor la kumno kumno shitaiew ïa ka sorkar ban pyrkhat khamtam ha kaba ïadei bad ka jingmap ei ïa baroh ki mukotduma.
U la pyntip ba ha kane ka jingïakren ki lai liang mamla, ka Sorkar ka la tyrwa ïa ki katto katne ki jingai jingmut. “Mynta ka sngi, ngin sa shong jingïalang ban ïakren halor ki jingtyrwa ba ngi la ïoh na ki bor Sorkar bad shen ngin shong ïa ka jingïalang ban shim ïa ka rai bad hadien kata ngin sap hah jingtip sha ki bad ma ki ruh kin sa ai jingpyntip sha ngi,” la bynrap u Bah Sadon.
Da kaba pynpaw ba ka HNLC kam pat warnah ïa ki Political Agenda sha ka miet jingïakren u Bah Sadon u la ong, “kane ka dei namarba ngi dang ap nyngkong eh ïa ka jingkhang ba kan plie shwa ba ngin pyntyllun shakhmat ïa ki political agenda ki bym lah ban shu pyndep noh tang hapoh shisngi ne ar sngi. Haba nga ong ïa ka jingkhang kaba dang donkam ïa ka jingïakren halor ka political agenda ka long ba baroh ar tylli ki sorkar ki dei ban pdiang ïa ka jingmap ei ïa ki jingpynngat kam bymman bad ban weng lut ïa baroh ki mukotduma la kano ha kano kano ruh ka dur kaba ki lah ban leh na ka liang jong ki khnang ba ngin dup lah ban ïaid shakhmat.