Mawkyrwat, Jymmang 25, 2025: Na ka bynta ban kyntiew ïa ka kam ïalehkai kynjatbol ha ki jaka nongkyndong, ha ka sien kaba ar ynsa pyntrei biang ïa ka madan phutbol ha ka shnong Nongbah kaba don ha Nongnah South West Khasi Hills District.
Lah ban kdew ba ïa kane ka jingkular ban pyntrei biang jong u bah Pius Marweiñ uba dei u MLA/MDC jong ka Ranikor Constituency ïa ka madan ka dei hadien ka jinghiar jurip da lade namar ka long kaba eh ban pyntrei trei ïa ka ba ka dap da u mawsiang suda bad ha kane ka jinghiar ban peit da la ki jong ki khmat u la kular ba yn trei pyndep noh syndon ïa kane ka madan khnang ba ki samla kiba don sap ha ka kam ïalehkai kin ïoh pyndonkam.
U bah Pius Marweiñ haba ai jingkren u la ong ba kane ka jingwan jurip sa ha ka sien kaba ar ka dei namar ka jingbym pat lah ban pyndep ha ka jingthmu ba nyngkong namar kane ka jaka ka long kaba eh ban trei ba ka long mawsiang. Kumta u la kular ba sa ha kane ka biang ba ar un sa pyrshang biang ban pyndep khnang ba ki samla kin ïoh pyndonkam ban pyntbit ha ka kam ïalehkai kynjatbol bad kiwei de ki jingdonkam jong ka shnong.
Namarkata, na ka liang u Myntri jong ka shnong Nongbah-Nongnah, kum juh ki khun samla jong ka shnong ki la pynpaw ka jingsngewnguh ïa ka jingkloi jong u bah Pius Marweiñ ha kaba ula kular ban pyntrei ïa ka madan namar ka long kaba donkam shisha ïa ki khun samla namar kumba long mynta kane ka shnong kam don madan ban ïalehkai ne wat tang ban kilanmet ban pyntbit ha kane ka kam.
