Shillong, Nailar 06: Ka Mission Smile ha ka jingïasnoh kti lang bad ka Topcem Cement kan ai jingsumar ei na bynta ki 25 ngut ki nongshong shnong jong ka jylla khamtam eh ïa ki khunlung khynnah ba kad shyntur lane ka Cleft Lip and Palate surgery mynta u snem 2022.
Haba ïakren bad ki lad pathai khubor, u Assistant General Manager ka Mission Smile u Dipul Malakar u la ïathuh ba ka kynhun ka la dep ban sumar ïa 4 ngut ki khynnah dang ha kine ki khyndiat sngi kiba la dep bad u la ïathuh ïa ki 21 ngut ba sah la kumno kumno yn sa pyndep mynta hi u bnai Nailar.
U la ong ba kane ka jingai jingsumar ei na ka bynta ki khynnah kiba donkam ïa ka Cleft Lip and Palate Surgery ka lah ban urlong da ka jindon ki kynhun ki karkhana bad ki kompeni kiba la kit khlieh ban bei pisa na bynta ka jinglut jingsep ka bai sumar.
U Dipul u la ïathuh ruh ba kane ka jingai jingsumar ei da ka Mission Smille ryngkat ka Topcem Cement ka long kum ka jingtrei na bynta ka bha ka miat ki nongshong shnong ka jylla khamtam na bynta ito kiba dei na ki longïing kaba duna ka ïoh ka kot.
Shuh shuh u la ïathuh ruh ba ka jingsumar ïa ka Cleft Lip bad Palate surgery kan long ha ka Mission Smile Comprehensive Cleft Lip Centre kaba don ha Mahendra Mohan Choudhury Hospital Guwahati namar ka jingbym don ki jaka ai jingsumar kiba biang ki tiar ki tar ban ai jingsumar ïa kiba donkam ban pyndep ïa kane.
“Lait na ki cleft surgery, ka Mission Smile ka tyrwa ruh ïa kiwei pat ki lad jingsumar ïa ki nongpang, kum ka C Comprehensive medical evaluation, reconstructive surgery kaba kynthup ïa ka surgery, medicine, test, nursing, child Life counseling, dentistry, speech therapy, nutritional counseling bad ka monitoring ïa ki khynnah kiba shitom,” ong u Malakar.
U la ong ruh ba ka Mission Smile ka la ïoh ban leh 109 tylli ki surgery ha Meghalaya ha kine ki san snem kiba la dep.
Katba u President jong ka sales and marketing jong ka Meghalaya Cements Ltd, u Dr. Anil Kapur u la ong ba ka Topcem Cement kaba long ka kompani kaba tang ma ka kaba la bei tyngka na bynta ki jingïarap sha ka imlang sahlang na bynta ka bit ka biang jong ki lyngba ka CSR jong ka. U la ong ba ka jingsnohkti jong ka bad ka Mission Smile, ka la ïatrei lang ruh bad ka sorkar ban plie ïa ki lad ki lynti na ka bynta ki khynnah kiba duna ka ïoh ka kot ha ka jylla.
