Ban shu kyrkait bad leh drama tangba la jan ka elekshon kan ym ïarap : Conrad Sangma

Shillong, Nailur, 14: Ka Dorbar Synrai jong ka Iingdorbar Thawaiñ ka Jylla ka la sakhi ïa ka jingïatai nia kaba khluuit halor ka mat kaba ïadei bad ka jingïasoi ïa ka Memorandum of Understanding (MoU) ïa pynbeit pud ha ka wat kaba nyngkong hapdeng ka Meghalaya bad ka Assam ban pynkut noh ïa ka jingïakajia pud ha ki hynriew tylli ki jaka bad ha kajuh ka por ka la pyneh beit ba kan ym lah shuh ban dang phai dien ïa kane ka soskular ba ladep ïasoi.
U Lamphang jong ka Iingdorbar Thawaiñ, u Bah Metbah Lyngdoh u la maham ïa u MLA jong ka North Shillong u Bah Adelbert Nongrum ba um dei ban shu kynnoh ïa u Lamphang haba u Bah Nongrum u la pyrshah ba um shym la ailad ban buh jingkylli halor ka jingïapynbeit pud bad kynoh ruh da kaba ong, “balei phim (Lamphang) pyrshang ban pyndom ïa nga.”
U Bah Nongrum u la kam ba u la rah kti la bun bun sien hynrei u Lamphang um shym la ailad satia ïa u ban ïashim bynta hynrei u la pynbna ba ka Iingdorbar Thawaiñ kan sa ïakren biang hadien ïa kane ka mat.
Ynda la ailad ban buh ïa ka jingkylli, u MLA ka North Shillong u la ong ba u Myntri Rangbah ka Jylla u Conrad Kongkal Sangma u dei ban bishar biang ïa ka MoU da kaba ong, “lada lah ban wanrah ïa ka jingpynbeit thymmai ha ka Riti Synshar ka ri India na ka por sha ka por hynrei balei pat ym lah ïa ka MoU, lada ym lah, ka don eiei sha lyndet.”
Haba ai jubab, u Sangma u la buh jingkylli kylla ïa u Bah Nongrum bad ong, “nga nud ban kylli ïa u, hato phi lah ban jer kyrteng ïa ki 12 tylli ki jaka ba don ha ka jingïakajia pud lada phi sngewkhia eh shaphang jong ki. Sngewbha jer kyrteng ïa ki bad katno sien u la leit sha kine ki jaka ba don hapdeng ka jingïakajia pud. Sngewbha ïathuh ïa ngi.”
Ha kane ka por, u Bah Nongrum u la sdang ban hylla bad ong, ka dei ka kamram jong u Myntri Rangbah ban jer kyrteng ïa ki 12 tylli ki jaka ba ïakajia pud bad kynnoh ba ka Sorkar ka la phiel da kaba khlem khot ïasyllok ïa ki kynhun bapher bapher.
Da ka jingbitar ïa ka jingkyrkait u Bah Nongrum, u Symbud Myntri Rangbah, Bah Prestone Tynsong uba peit ïa ka tnat Parliamentary Affairs u la tuklar da kaba ong ïa u Bah Nongrum kumno u nud ban shu kynnoh kumta haba u dei tang ban shu buh ïa ka jingkylli.
“Sngewbha wat thaw drama, u dei ban shu kylli jingkylli. Wat kren da ka jingsngew, phim tip eiei bad wat pyrshang. Ai ba un jer ïa ki kyrteng jong ki jaka ba ïa kajia pud,” ong u Bah Tynsong.
Da kaba bteng ban ai jubab u Myntri Rangbah u la ong, ban shu thaw drama bad ban shu pyrshang ban pyni ïa ka jingsngew kam dei satia ka lynti. Katkum ka jingsngew jong u Myntri Rangbah, lada uno uno u dkhot u don ka jingsngewkhia ïa kano kano ka jaka u dei ban pyntip khnang ba ka Sorkar kan long kaba kloi ban ïasyllok. U la ong ban shu kyrkait bad shu thaw drama tang namarba la jan ka elekshon kan ym ïarap eiei.
“Sngewbha ban ïathuh ïa ngi kaei kaba phi don ban ong. Kane ka dei ka kam kaba khia. Ngi don hangne ban ïakren ïa ka kam kaba khia, ngi don hangne ban jubab. Sngewbha ai jingmut ïa ngi lane ai ïa ki jingkynthoh kiba tei. Ban shu pynpaw da ka jingsngew kam lah ban long,” u la ong.
“Dei tang kane ka sorkar kaba nud ban kren ïa kane. Ngi la shim ïa ka jingkitkhlieh bad ngin leh ruh ïa kata bad dei ma ngi ba nud,” la bynrap shuh shuh u Myntri Rangbah.
Halor ka jingkylli ba la wanrah da u MLA ka Nongpoh u Bah Mayralborn Syiem, u Sangma u la pynshai ban dang phaidien biang sha ka jingïakren halor ka MoU yn ym lah satia da leilei ruh.
“Ngi long kiba kloi ban ïasyllok bad bad ban ïakren bad ki paidbah hynrei ban phaidien biang sha ka MoU kan ym jia shuh da leilei. Lada ki dkhot jong ka iing ki sngewbha na ka bynta ki katto katne ki shnong, ngi kloi ban ïakren hapoh ka kyndon jong ka MoU,” ula ong.
U la pyntip ba ka jingsorjamin ïa ka jingthmu ban phiah ïa u pud u sam ka dang ïaid bad ong ruh ba ïa kane la leh da ka jingïadonlang jong ki ar tylli ki tnat treikam jong ka Sorkar Meghalaya bad Assam. Ha manla ki jingleit sorjamin ka long kaba donkam ïa ki tnat treikam jong ki ar tylli ki Sokar ban ïadon lang bad ïa kane ka la leh da ka jingsakhi lang jong ki paidbah.
U la ong, tang shu dep sorjamin ka Survey of India ïa kaiphod halor ka jingphiah ïa u pud u sam yn sa aiti noh. “Hadien kata, ïa ka Bill yn sa phah bad mynjur ha Parliament,” la bynrap u Conrad.
U la pyntip ba palat 28 tylli ki jingïalang paidbah bad 18 tyli ki jingleit jurip la pyndep ha ka wat pynbeit pud kaba nyngkong. Haduh 90-98% na ki shnong kim shym la ujor eiei namarba ki hun (ïa kane ka lynti ïakren pynbeit pud,” u la ong.
U MLA jong ka Umroi Constituency u Bah George B. Lyngdoh u la kdew ruh ba katkum ka clause 9 jong ka MoU ka ong, ‘la rai ba kino kino ki jaka/shnong kiba don shabar jong ki jaka ba don ha ka jingïakajia pud ba la pyni ha ki Map ba la aiti da ka Meghalaya lyngba ka shithi…dated August 8, 2011 yn ym lah ban pdiang.”
U la ong ba ka MoU ka la ïaid lait na ki dulir ba la aiti da ka Sorkar Jylla hynrei u Myntri Rangbah u la jubab ba ka long kaba eh ban ïaid lait na ka kaiphod jong u snem 2011.
Halor kane, u Myntri Rangbah u la ong, “kaei kaba ngi ladep rai ha ka MoU ngim lah shuh ban ïaid shabar jong ka Map.”
“Kan eh ïa ngi mynta ban pynkohnguh ïa ka Assam mynta ba haoid ha u snem 2011 kine ki shnong ba ïakajia pud bad mynta ngi sngewthuh ba ki don palat 20 tylli ki shnong,” u la bynrap.
Ha kajuh ka por, u Myntri Rangbah u la pyntip ba ka jingïakren pynbeit pud ha ka wat kaba ar bad ka Sorkar Assam ka ladep sdang ha ka 21 tarik u Nailar.
U la pyntip ba ka Sorkar Jylla ruh ba ladep pynkheh ïa ka thup jong ki Regional Committees bad kular ruh ba ki dkhot kin long na ki Autonomous District Councils (ADC).