Shillong, Naitung 11 : Ka Umrynjah Sports and Culture club kum shi bynta ban ïoh ban khmih bniah bad ban sei ïa ki rangïalehkai donsap na ka bynta ka jingpynkhreh ban ioh rung sha ka lympung ïakhun jong ka Shillong Sports Association ka la pynlong ïa ka Inter-house football tournament ha madan shnong.
Napdeng ki san tylli ki Kynhun (team) kiba la ia shim bynta, ka Team A ka la ïohrah ïa ka namlahduh hadien ba ka la pynliem ïa ka Team B ha ka final ba la ïakhun haka sngi Saitjaiñ.
Ha kane ka tournament la ïa don ryngkat u MDC ka Mawlai konstitwensi u Bah Teiborlang Pathaw, u Bah Dipshon Lyngdoh Nongbri uba long ruh u dkhot jong ka SSA bad kiwei kiwei.
Haba ai jingkren ha kane ka sngi u Bah Teiborlang Pathaw ula pynpaw ba u don shibun ki jingthmu ban kyntiew ïa ki Sports Club kiba na Mawlai kiba la ïoh rung ha ka SSA bad na ka liang jong u un ïarap katba lah ban pynbiang ïa ki jingdonkam jong kine ki sports club khnang ba kin ïa kop kyrdan lang bad kiwei ki club.
Katba na ka liang u Bah Dipshon u la pynpaw ba kam don jingeh na bynta ka Umrynjah Soprts Club ba kin ïoh rung ha ka SSA namar ba ki don la ka jong ka Madan football bad ba ki donkam ïa ka No Objection Certificate (NOC) na u Rangbah Shnong ban pyndon kam ïa ka Madan football shnong.
U Bah Dipshon u la kyntu ruh ia ki Sports Club Mawlai ba kin ïa shim bynta ruh ha kiwei pat ki jait sports kum ka Cricket kaba don shibun ki lad ban kyntiew ïa ki Nongïalehkai wat haduh ka National level.
