Ban pynthikna ka jingpyntrei hok ïa ki kam pynroi ha Ribhoi, jurip u Myntri Khynnah ka Sorkar Pdeng

Nongpoh, Naiwieng, 11: U Myntri Khynnah ka Sorkar Pdeng, uba peit ïa ka tnat Consumer Affairs, Food and Public Distribution, u B.L. Verma, mynta ka sngi u la wan iuhkjat ha Ri-Bhoi District kaba dei kawei na ki Aspirational District jong ka ri. Ka jingwan jong u ka dei na ka bynta ban peit, ban khmih bad ban wad jingtip halor ka rukom pyntreikam jong ki kam pynroi bapher bapher kiba la dep pyntrei da ka sorkar pdeng ha kane ka District.
Ha kane ka jingwan jong u Myntri Khynnah, la synran lang da u Additional Deputy Commissioner ka Ri-Bhoi, Bah Jonathan Shylla, u Block Development Officer ka Umling C&RD Block, Bah Erick K. Dkhar, ka Assistant Commissioner E. Pradhan, lem bad kiwei pat ki ophisar na ka District.
U Myntri Khynnah u la sdang ïa ka jingjurip da kaba leit peit shuwa ïa ka One Stop Centre ha Nongpoh, hadien pat u la leit jurip ïa ka Mawtnum Fair Price Shop, ka Umdihar Food Processing Unit, bad ka Umroi Health and Wellness Centre. Ha man la ka jaka ba u leit jurip, u la kylli bñiah halor ka rukom pyntreikam jong ki scheme pynroi kiba la wanrah hapoh ka bynta jong ka Aspirational District Programme.
Ka jingthmu jong kane ka jingjurip, ka dei ban pynshai bad ban pynthikna ba la pyntrei hok ïaki kam pynroi, khlem jingpyndonkam bakla ïa ki song pisa, bad ban pynthikna ruh ba ki projek pynroi kin ïaid beit ïaid ryntih khnang ba kan kyntiew ïa ka roi ka par bad ka ioh ka kot jong ki paidbah ha Ri-Bhoi District.
U Myntri Khynnah ka sorkar pdeng u la pynbna ruh ba un pynlong ïaka Press Conference ha ka 12 tarik Naiwieng 2025, ban batai shaphang ka jingthmu jong ka jingwan jurip ha Ri-Bhoi bad ban kren halor ka rukom pyntreikam ki kam pynroi bapher-bapher katkum ka thong jong ka Aspirational District Programme.