Ban pyntbit ïa ki khynnah ka jingïalehkai phutbo, plie ka RBP Higher Secondary School da ka Football Academy

Nongpoh, Risaw 07: Ban sei madan ïa ki sap ki phong ki khynnah skul ha ka kam ïalehkai phutbol bad kumjuh ruh ban pyntbit ha ka kam ïalehkai phutbol, ka RBP Higher Secondary School, Nongpoh mynta ka sngi ka la plie paidbah noh da ka ‘Football Academy’ hapoh jong katei ka skul shi bynta ban ai jingjihi bad pyntbit ïa ki khynnah skul ha ka kam ïalehkai phutbol.
Ïa kane ka Football Academy jong ka skul RBP Higher Secondary School, Nongpoh la wan ban plie paidbah da u MLA ka Nongpoh, u Bah Mayral Born Syiem kum u kongsan bad la sakhi lang ruh da ka jingdon lang u Principal, u Bah W. Radu, u Secretary ka School Managing Committee, u Rev. D.R Suting, u Rangbah Shnong ka Pahamlapong, u Bah Mathew Makdoh, ki nonghikai bad ki khynnah skul katei ka skul.
Kum ban pynpaw, ka jingthmu ba la buh ïa kane ka Football Academy kumba la pynpaw da ki bor pynïaid ka skul, ka long shi bynta ba ki khynnah skul nalor ka pule ka puthi ban wad jingnang jingstad, ki angnud ruh ban kyntiew ïa ki khynnah kiba don sap ha ka kam ïalehkai phutbol kynthup kynthei bad shynrang bad dei namar kane ka daw na ka liang ka skul ka la plie noh ïa kane ka Football Academy hapoh jong katei ka skul.
Ha kane ka sngi ki khynnah kiba la pynrung kyrteng ban don hapoh kane ka Football Academy kynthei bad shynrang ki la don kumba 30 ngut bad na ka liang ki bor pynïaid ka skul kin dang ailad ruh ïa ki khynnah ban don bynta ha kane ka Academy ban pyntbit ïa ki khynnah ha ka kam ïalehkai phutbol.
Haba kren ha kane ka sngi kum u kongsan, u Bah Mayral Born Syiem, u la pynpaw ka jingkmen ïa ki bor pynïaid ka skul Ri Bhoi Presbyterian Higher Secondary School, Nongpoh kiba la don ka jingiohi jngnai ban buh sa ïa kane ka Football Academy nalor ba ki shakri ban kyntiew ïa ka pule ka puthi bad ban ai jingnang jingstad ïa ki khynnah skul.
U la ong ruh ka jingdon kane ka Football academy ka long ka jingkyrkhu ïa ki khynnah ba don sap ha ka kam ïalehka phutbol, namar na kane ka Football Academy ki la ban mih shibun ki khlur ïalehkai ki ban sa wan rah ïa ka nam bad ka burom bad ngi tip shai ba ha kine ki sngi ka kam ïalehkai phutbol kam dei shuh kata ka kam ban shu ïa kyllan met, hynrei lada ki samla ki don shisha ka sap ka la long ruh kawei na ka lad ai kam ai jam kaba long ka jingkyrkhu na ka bynta ki khun samla ka dong bad ka thain Ri Bhoi.
Kum u nongmihkhmat paidbah, u la kyntu ruh ba ki samla ki don ki sap ha ki bynta bapher bapher la ka ka kam ïalehkai phutbol,, ka kam rwai, ka kam shad, ka kam pule puthi bad ban poi sha ka thong kaba ki angnud kum ki samla ki donkam ban pynleit jingmut bad ban trei shitom, namar dei tang kito kiba pyleit jingmut bad kiba trei shitom ki lah ban poi sha ka kyrdan jong ka nam kaba long ka burom ym tang ïa ka ing ka sem, ka skul bad ka long ruh ka burom ïa ka ri bad ka jaid bynriew, u la bynrap.