Ban pynsuk bad ban kyntiew ïa ka ïoh ka kot jong ki nongrep, pyllait ka sorkar Meghalaya ïa ka skim kali nongrep

Khliehriat naitung 21: U Deputy Commissioner ka East Jaiñtia Hills District, u pynbna paidbah ba ka sorkar jylla ka la pyllait ïa ka skim thymmai ba la tip kum ka ‘Meghalaya Agriculture Response Vehicle Scheme’ kaba dei ka skim kali ïa ki nongrep, kane ka long ruh halor ka jingthmu ban pynsuk ïa ki nongrep ban pynpoi ïa ki mar rep, kumjuh ruh kan kyntiew ïa ka ïoh ka kot jong ki nongrep, kan long ruh kum ka lad aikam aijam khamtam ïa kito ki jaka kiba ha ki shnong nongkyndong
Ka tnat jong ka rep ka riang ka ‘Department of Agriculture & Farmers’ Welfare’ jong ka jylla Meghalaya lyngba katei ka skim kan ïarap haduh 50 percent ban ïarap ïa ki nongrep ban thied ïa ki kali ban kamai ban kit tang ïa ki mar rep bad yn jied tang 200 ngut ki ban ioh ïa kane, kine ki kali kin iarap ïa ki shnong ki thaw kiba khlaiñ bha ha ka rep ka riang, kumjuh ruh ban kyntiew ïa ka khaiï ka pateng jong ki nongrep ha kaba kine ki kali kin shim bai kit ha ka dor kaba biang ym dei ka dor kaba rem.
Ki riew shimet bad kino kino ki kynhun ne ki association jong ki nongrep ki lah ban aplai ïa kane ka skim, kumjuh ruh ki Farmer Producer Companies (FPC), ki Farmer Producer Organisation (FPO).Kito kiba aplai shimet ki dei tang kiba la kynjoh ïa ka 18 snem sha neng bad hapoh 58 snem kyrta, ki dei ban don ka license ñiah kali kamai kaba dang biang ka por (valid commercial driving license), ka ID proof kum ka aadhar card, ka jaka sah, ka dur shiteng.
Na ka bynta ki kynhun nongrep kiba lah dep register, ki dei ban don ka syrnot register ‘Incorporation Certificat bad kim dei ban don kano kano ka jingdkoh bad kano kano ka shlem ai pisa.
Kiba kwah ba aplai, ki lah ban aplai online bad offline ruh, kito kiba aplai offline ki lah ban ioh ïa ki form na ka ophis jong ka District Agriculture bad ki dei ban aiti ïa ki form ha ka ophis District Agriculture bad na ka bynta kito kiba aplai online ki lah ban ioh ïa ki aplication Annexure 1 bad Annexure 2 na ka website jong ka ophis (http://www.megagriculture.gov.in), ïa ki kot ba donkam bad ïa ka form lah ban shu sei online ruh na ka website.
Kiba ioh jingmyntoi kin sa ioh ïa ki shithi na ka sorkar jylla, kumjuh ruh kin paw ha ki website jong ka tnat ka rep ka riang ka Agricultural & Farmer’s Welfare Department, ki lah ruh ba leit shim ïa ki hard copy na ka ophis jong ki Block Nodal Office