Ban pynsaphriang jingtip shaphang ki skim sorkar pynlong ka ophis u DC da ka jingai jinghikai ryngkat ka jingiatreilang bad ka HESPL
Khliehriat Risaw 24: Kiba bun ki paidbah nongshong shnong khamtam kito kiba na ki thaiñ nongkyndong bun ba kim ju kham ïoh jingtip bniah shaphang ki skim ba wan na ka sorkar pdeng bad kumjuh na ka sorkar jylla, kumta ka ophis u Deputy Commissioner jong ka East Jaiñtia Hills District ha ryngkat ka jingïatreilang bad ka Haqdar Empowerment Solution Pvt Ltd (HESPL) ka la pynlong ïa ka prokram ai jinghikai kaba ar sngi lynter ha kaba ki heh jong ka HESPL ki la ai jinghikai ïa kiba wan shah hikai.
Ha kane ka jingai jinghikai la jied iwei na man la kawei pa kawei ka shnong na East Jaiñtia Hills District ban wan shah hikai, halor kumno ban pynsaphriang jingtip sha ki nongshong shnong shaphang ki skim bapher bapher, kumta na ka bynta ka Wapung C&RD Block la pynlong ïa ka jingai jinghikai myn ha ka 19 tarik ha conference hall ha ophis u Deputy Commissioner ha Khliehriat bad na ka bynta ka Saipung C&RD Block la pynlong myn ha ka 20 tarik ha ophis C&RD Block ha Latyrke.
Kane ka jingai jinghikai ka dei kawei na ki project ba la bei tyngka da ka District Mineral Funding Trust (DMFT) ka ban long na ka bynta ka jingmyntoi ki paidbah, kaba la shim ruh ïa ka jingïatreilang bad katei ka tnat khaii, ka Haqdar Empowerment Solution Pvt Ltd.
La wan ban ïa shim bynta ha kane ka jingai jinghikai da ki dkhot jong ki Self Help Group ha kaba kiba ai jinghikai ki la hikai kumno ban pyndap ïa ki form, kumno ban pyn poi ïa ki form sha ki tnat kiba dei peit ïa ki skim bad ruh la hikai kumno ban pyntreikam da ki mobile app kiba long katkum ka juk jong ki kor ki bor bad kumjuh ruh lyngba ki bor technology yn lah ruh ban buddien haduh ba ki nongshongshnong kin ioh ïa ki skim kiba ki dei hok ban ïoh.
Kiba la wan ban ai jinghikai ki kynthup u Project Manager, uba dei ruh u Operator jong ka Haqdar Empowerment Solution Pvt Ltd Guahati, u Ashique Hassan, u Manager Training and Development Haqdar Empowerment Solution Pvt Ltd Raipur Chhattsgarh, u Rishikesh Mishra, ki la hikai ruh halor kumno ban leit sha ki nongshong shnong ban pynsgewthuh ïa ki ba kin applai ïa ki skim ki ban wanrah jingmyntoi ïa ki paidbah ban kyntiew ïa ka ïoh ka kot jong ki
Kiba la ïa don bynta lang ha kane ka project ba ai jinghikai, ki kynthup u Deputy Commissioner ka East Jaiñtia Hills District, u Abhilash Banarwal, IAS, u Additional Deputy Commissioner, u bah Jonathan Shylla, u Project Manager DMF, u bah Lumlangki Pohti, u District Mission Manager , MSRLS-EJHD, u bah Kevin Slong, u Project Coordinator Operation Haqdarshak khliehriat, u bah Feberius Dkhar, u Project Fellow Wapung C&RD Block, u bah Soky Dkhar, u Project Fellow Saipung C&RD Block, u Merphilos Darnei.