Ban pynneh pynsah ïaka um bad kyntiew ïaka ioh ka kot ki paidbah
Sdang ka ophis u BDO Bhoirymbong ïaka Amrit Sarovar, 16 lakh mang pisa ban pynbha ïaka pung shnong Mawtneng lyngba ka skhim MGNREGS
Nongpoh, Jylliew 02: Ka ophis jong u Block Development Officer, Bhoirymbong Block mynta ka sngi kala sdang bad plie paidbah ïaka Amrit Sarovar kawei naki thong jong ka sorkar ban pynneh pynsah ïaka um bad ban pynim ruh ïaki tyllong um ha man la ki district haka ri kaba dei ruh shibynta ka jingrakhe ïaka Azadi ka Amrit Mahotsav haka jingïalang kaba la long haka shnong Mawtneng ha Ri-Bhoi naka bynta ban pynneh pynsah ïaka pung shnong kaba don ha katei ka shnong bad ban pynbha ïaka.
Ha katei ka jingïalang la wan ruh ban shim bynta da u Bah BJ Kharshandi, Project Director ka DRDA kum u kongsan haka jingdonlang u Dr. CJK Warjri BDO ka Bhoirymbong C&RD Block, ki nongïalam ka VEC Mawtneng bad kiwei kiwei ki riew rangbah ryngkat ki paidbah nongshong shnong ka shnong Mawtneng.
Naka liang u kongsan ha katei ka sngi u la aiti ruh ïaka Work Order kaba T.16, 87,942/- lyngba ka skhim MGNREGS jong u snem 2022-23, sha u Chairman ka VEC Mawtneng naka bynta ban pynbha ïaka pung shnong kumba katei ka shnong ka don ruh ka jingangnud ban pynlong kum ka jaka jngohkai pyrthei halor ka jingdon ka pung ba itynnad kaba ka shnong kala shimkhia ban tei lyngba ki jingïarap naki skhim sorkar bapher bapher bala pynwan dur ha kata ka rukom ban khring ïaki paidbah kiba wankai.
Haba kren ha katei ka sngi naka liang u Bah BJ Kharshandi kum u kongsan u la ai ka jingïaroh ïaka shnong Mawtneng kaba la shim ïaka sienjam ban shna da ka pung shnong kaba lah ruh ban pynkylla kum kawei naki jaka jngohkai pyrthei bad kumjuh ruh ka kam ri dohkha bad dei na katei ka daw ba ka sorkar kala jied ïa katei ka shnong ban ioh pdiang ïa katei ka skhim lyngba ka Amrit Sarovar ban pynbha bad pynitynnad shuh shuh ïa katei ka pung.
Hakajuh ka por u la pyntip ruh ba ka sorkar kan jied kumba 75 tylli ki jaka ha Ri-Bhoi District naka bynta ban shna ïa kiba kum kitei ki pung shnong ban pynneh pynsah ïaka um, ban kyntiew ruh ïaka kam ri dohkha bad kumjuh ka ioh ka kot ki paidbah, kumta ki shnong ki dei ban shim kabu ban pynbiang ïaki jaka kiba ym duna ïaka 1 akar ka jingheh naka bynta ban shna pung, ryngkat ka jingai mynsiem ruh ïaki paidbah ba kidei ban sumar ïaka mei mariang ban thung ïaki dieng ki siej bad ban pynneh pynsah ïaka mei mariang bad ki jingthaw ba im.