Ban pynmih pisa na bynta ka kam Ba lang, mih ki khun samla ban pynlong da ka phutbol ba 2 sngi ha Umtasor

Nongpoh, Risaw, 18: Shibynta ban pynmih pisa na ka bynta ka kam jong u Blei, ki khun samla jong ka Balang Catholic Nong-mawlong mynta ka sngi ki la mih shakhmat ban pynlong da ka jinglehkai phutbol ba 2 sngi lynter ba la plie pyrda mynta ka sngi thohdieng bad pynkut pat lashai ka sngi saitjaiñ.
Ïa katei ka lympung ïalehkai la wan ban plie pyrda da u Bah Rocky Marweiñ uwei na ki samla rangbah ka dong Ri-Bhoi kum u kongsan, ha ka jingdonlang ki nongsharai Ba lang, lem bad ki khun samla jong ka Ba lang Catholic Nongmawlong.
Ha katei ka lympung ki don kumba 20 tylli ki kynhun kiba la wan ban shim bynta ba la pynlehkai beit da ka Knock Out system ha madan ïalehkai ka shnong Umtasor Nongrim Jyrmie. Ka jinglehkai plie pyrda ha katei ka sngi ka la long hapdeng ka Nongmawlong pyrshah ïa ka Mawiapbang ha kaba ka Nongmawlong ka la lah ban pynliem noh ïa ka Mawiapbang da 4-2 kol lyngba ka tie breaker.
Haba kren ha katei ka sngi na ka liang u Bah Rocky Marweiñ kum u kongsan u la ai ka jingïaroh ïa ki khun samla jong ka Balang Catholic Nongmawlong kaba la shim ïa katei ka sienjam ban pynlong ïa katei ka lympung na ka bynta ban pynmih pisa ïa shibun ki jingdonkam na ka bynta ka kam jong u Blei, bad kum uwei na ki samla rangbah ba ju trei na ka bynta ka imlang ka sahlang u la aiti ruh ïa ka song pisa sha ki khun samla jong katei ka Ba lang kum ka jingkyrshan bad don bynta lang ha katei ka lympung.
U la kyntu ïa ki samla ba kin im ka jingim kaba long ka nuksa ïa kiwei ki samla kiba dang rit ka rta bad kiar na ki jingmlien ba sniew kum u drok bad kiwei kiwei ki jingdih buaid kaba ktah ïa ka koit ka khiah, ka longrynieng bad ïa ka imlang ka sahlang hi baroh kawei.