Ban pynmih pisa ïa ka skul pynlong “Exhibition Cum Sales Day” ka Khimusniang Presbyterian SS

Jowai, Risaw 20: Ka Khimusniang Presbyterian Secondary School, Jowai mynta ka sngi palei ka la ïoh ban pynlong ïa ka “Exhibition Cum Sales Day”, shi bynta ban pynmih pisa ban shna pynheh (Extend) ïa ki kamra klas jong ka skul.
Ïa kane ka prokram la wan ban plie pyrda da u kongsan uba dei ruh u Chairman jong ka Balang Presbyterian Khimusniang, Jowai u Rev. K. Syiemlieh ha ka jingdonlang ka Headmaster jong ka skul ka kong Widawan Nangleiñ kaba la ai ki kyntien pdiang sngewbha ïa baroh, nalor ki kmie ki kpa, ki nonghikai bad ki khynnah skul. Katba ïa ka jingïalang la pynïaid da u TBn. P. L. Dkhar ha Jubilee Halls jong ka Balang Khimusniang.
Ha kane ka ‘Exhibition Cum Sales Day’ ki khynnah pule jong ka skul kila wanrah ïa ki tiar ki tar bapher bapher ba la shna kyrpang kumjuh ruh ki jingbam ba bun jait, ki jingdro dur bad kiwei kiwei de.
U kongsan Rev. Syiemlieh haba ai jingkren ula kyntu jur ïa ki khynnah skul ba kin long kiba mihnot bha ha ki jingpule kot bad haka juh ka por lyngba ka jingdon kum kine ki prokram pyninam kala ïarap shuh shuh ïa ki khynnah skul ba kin pynpaw pyrthei ïala ki sap ki phong ba ki don.
“Ka jingpynlong kum kine ki Exhibition kan ïarap shibun eh ban kyrshan pisa ïa ki jingdonkam ka skul kaba kynthup lang naduh ka tulop ki nonghikai bad kiwei de” la ong u pastor. Shuh shuh ula kitbok ïa kane ka skul ba kan dang ïaid shaphrang ba ai ka jingnang jingstad ïa ki khynnah pule kiba wan na kiwei de ki jingngeit, namar ïa kane ka skul la seng nongrim ïa ka ha ka kyrteng jong u Trai bad u Nongpynim u Jisu Khrist.
La pynphuh pynphieng shuh shuh ïa kane ka ‘Exhibition Cum Sales Day’ mynta ka sngi da ka jingïashim bynta lang ki khynnah skul ha ki jingïalehkai pynbyrnia naduh ki Fancy Dress bad ki jingshad bapher bapher.
Hashwa ban plie ïa ka Expedition la don ka jingïalang ba lyngkot ha kaba la ïoh ban pule na ka ktien jong U Blei na uwei na ki khynnah skul u Bethwellsing Hua bad ka jingduwai na u babu Ioomanmi Bang, katba ïa ki kyntien ai khublei la ïoh na u babu P. Karsyntiew.