Ban pynmih pisa ban kyrshan ïaka skul ha Kyrdem Kulai, da ka lympung ïalehkai phutbol pynlong ka KSU
Nongpoh, Rymphang 08: Da ka jingthmu ban kyntiew ïa ki khun samla kiba don sap ha ka kam jingïalehkai phutbol bad ruh ban pynmih pisa na bynta ban kyrshan ïa ka Kyrdemkulai LP & UP School, ka Khasi Students Union (KSU) Kyrdemkulai Unit, kaba hap hapoh ka KSU Umsning Circle, mynta ka sngi ka la sdang ïa ka lympung jingïalehkai phutbol ba la tip kum ka Maitshaphrang Cup, kaba la pynlong ha Kyrdemkulai.
Ïa kane ka lympung la plie pyrda paidbah da u Bah Lambok Rymbai, Vice President ka KSU North Khasi Hills District, kum u kongsan, ha ka jingdonlang u Bah David Lyngdoh, uwei na ki samla ka thaiñ, kum u symbut kongsan.
Kiwei pat kiba la ïa don lang ha kane ka sngi ki kynthup ïa u President ka KSU Umsning Circle u Samla Lester Nongbet, u Bah P. Kharnaior, Rangbah Shnong ka Kyrdemkulai, u General Secretary ka KSU Kyrdemkulai Unit u Samla Atiarbaneh Laloo, lem bad kiwei ki dkhot ka KSU bad ki riew rangbah ka shnong.
Ha kane ka lympung jingïalehkai phutbol la wan shim bynta haduh 16 tylli ki kynhun na ki shnong bapher bapher. Ha ka jingïalehkai ba nyngkong ha ka sngi plie pyrda, la jingïakhun kala long hapdeng ka Kur Shylla bad ka KSU Umran Niangbyrnai, ha kaba ka KSU Umran Niangbyrnai ka la jop ïa ka jingïakhun da 2-1 kol.
Ha kane ka sngi plie pyrda, u Samla Lambok Rymbai, u Bah Dabid Lyngdoh bad u Samla Lester Nongbet ki la ai jingkren ha kaba ki la ai jingïaroh ïa ka KSU Kyrdemkulai Unit kaba la lah ban pynlong ïa kane ka lympung, da kaba ai rynsan ïa ki samla don sap ha ka kam phutbol bad ruh ban kyrshan ïa ka Kyrdemkulai LP & UP School na bynta ban kyntiew ïa ka pule puthi.
Ki la khot jingïawer ruh ïa ki samla ban pyndonkam hok ïa ki sap ki phong kiba ki don ha ka jingïalehkai phutbol, da kaba ong ba ka jingïalehkai kam dei tang ka jingïalehkai hynrei ka dei ruh ka lad ban kiew shaphrang ha ka jingim, kaba wanrah ïa ka burom bad ka nam ïa ka dong bad ka thaiñ, namar ha kane ka juk mynta ka kam ïalehkai phutbol ka la long kawei na ki lad ai kam ai jam ïa ki samla.