Khliehriat Lber 20: Kum ka jingpynkhreh lada jia ba wan ka jingkhih jumai ba jur, ka District Disaster Management Authority (DDMA) jong ka East Jaiñtia Hills District mynta ka sngi ka la pynlong ïa ka mock drill ha kiba bun ki jaka bad ha ki shnong hapoh ka district bad la ïa shimbynta lang da baroh ki tnat sorkar, ki company dewbilat kiba don hapoh ka district, ka National Highway Authoriry of India kumjuh ruh ki bor pyniaid shnong ba kynthup ki Waheh Shnong bad ki dkhot shnong.
Baroh ki tnat sorkar, ki la shim ïa la ka jong ka bynta kumba ki dei ban leh, kum ka tnat ka koit ka khiah, ka tnat Civil Defence, Fire & Emergency Service bad kiwei kiwei ki tnat.
U Deputy Commissioner, uba dei ruh u Chairman jong ka District Disaster Management Authority East Jaiñtia Hills District, u Shivansh Awasthi, IAS u la ong ba hashwa ban pynlong ïa kane ka State Level mock drill ka ban long kum ka jingai jinghikai lada jia ba don ka jingkhih jumai, la leh ha East Jaiñtia Hills District ruh, la sdang naduh ka por 9.30 mynstep bad ha shwa kane u DC la dep ban shong jingialang bad ki rangbah shnong bad kyrpad ïa ki ba kin sngewbha ban ïa shimbynta lang ha kane ka mock drill exercise, kumta kane ka mock drill ka dei kaba la ïa shimbynta lang da baroh ki tnat sorkar, ki shnong ki thaw, ki company kiba don hapoh ka district “Ngi la buh ïa ki khynhun ha kiba bun ki jaka, la buh ruh ruh ïa ki Incident Commander ban pyniaid ïa ki kam bad ha ki jaka kum ha Kuliang ruh la leh ïa kane ka mock drill kaba dei ka jaka ba ju don ka jingtwa khyndew” la bynrap u Deputy Commissioner.
La sdang ïa kane ka Mock Drill na ophis u Deputy Commissioner na Khliehriat da ka jingpyn Sawa ïa ka siren bad ha madan Dkhiah East bad Dkhiah west pat la buh kum ki Staging Area, ïa ki bynta jong ka mock drill la leh ha Civil hospital Khliehriat, ha I-India Mart, ha Dkhiah Service Station, ha company Max Cement ha shnong Nongsning, ha Lumshnong, ha Kuliang, ha ïing ki briew ha Ladsutnga bad ha kiwei kiwei ki jaka.
Kane ka Mock Drill ka long hapoh ka jingpyniaid u Deputy Commissioner uba dei ruh u Chairman jong ka District Disaster Management Authority East Jaiñtia Hills District, u Shivansh Awasthi, IAS.
