Jowai, Rymphang 04: Kum shi bynta na ka jingpynkhreh ïa ka Mock Exercise ha Amlarem, mynta ka sngi Balang la pynlong ïaka jingai jinghikai halor ki lad jingïarap lada wan ka jingkhynñiuh jumai ha Conference Room jong ka ophis u Sub-Divisional Officer (Civil), Amlarem, na ka bynta ki dkhot jong ka Incident Response Team (IRT).
Ka Incident Response Team (IRT) ka kynthup ïa ki ophis jong ki Sub-Divisional bad ki ophisar na ki tnad sorkar bapher bapher hapoh ka Amlarem Sub-Division bad kiba don bynta ban ai jingïarap sha ki paidbah ha ki por ba kynduh jingeh na u Jumai.
Ïa kane ka jingïalang la pynïaid da ka Sub-Divisional Officer (Civil), Amlarem, ka kong Vevotolu Kezo, IAS, bad la ai ïa ka jinghikai da ki dkhot na ka Police Department bad ka Home Guards.
Ha kane ka prokram la ai jinghikai ïa ki dkhot halor ki rikom ai jingïarap kaba nyngkong eh (first aid), ka rukom sumar ïa kiba mynsaw bad ka rukom pynkynriah ïa kiba shitom sha ka jaka kaba shngain. La ai jingtip halor ka rukom shna stretcher da ki mar kiba lah ban ïoh na ka shnong, kum ki siej bad ki blanket.
Kane ka jinghikai ka long kum shi bynta jong ka jingpynkhreh na ka bynta ka Mock Exercise ka ban sa long ha ka 9 tarik Rymphang, 2026 hapoh ka Amlarem Sub-Division.
