Nongpoh, Risaw 24 : Kum kawei na ka seng trai ha Ri Bhoi kiba ju trei na ka bynta ban kyntiew ïa ka bha ka miat bad ka roi ka par jong ka dong bad ka thaiñ ka them Ri Bhoi, ka Ri Bhoi Youth Federation (RBYF) sengkmie ryngkat ka RBYF Byrnihat Circle ha kane ka kynti ki la pynmih ruh sa kawei ka shnat treikam ki Kynthei ba la tip kum ka ‘RBYF, Byrnihat Circle, Women’s Wing’.
Ïa kine ki nongïalam ka RBYF Women’s Wing ka Byrnihat Circle la pynskhem da ka seng kmie ha ka jingïalang kaba la long ha ka Sngi Saitjaiñ ha Byrnihat ha kaba la wan ban pynskhiem da u Political Secretary ka sengkmie, u Bah R.J Thangkhiew ha ka jingdon lang u President ka RBYF Byrnihat Circle, u bah Vigyan Kharkongngor lem bad ka jingdon lang kiwei ki dkhot na ka sengkmie bad na ka Byrnihat Circle.
Kine ki Longkmie kiba la shim ïa ka kyrdan nongïalam ka RBYF, Women’s Wing na Byrnihat Circle ki kynthup ïa ka President ba la jied ïa ka Kong Twassibon Lapang, Vice President, Barisha Lapang, General Secretary, Maryrose Makri, Assistant Secretary, Senti Marry Makri bad kiwei ki nongïalam bad ki dkhot ka seng ki ban sa shim lang ïa ka jingkitkhlieh kum kita ki nogïalam na ka liang ka Women’s Wing.
Haba kren ha ka jingïalang pynskhem ïa kine ki Longkmie kiba la shim ïa ka lyngkor kum kita ki nongïalam ka RBYF Women’s Wing na Byrnihat Circle, U Bah R.J Thangkhiew, u la ong ba ka seng ka dang dang don ïa ka thong ban dang sei ruh shibun ki nongïalam na ka liang ki Longkmie bad ki samla kynthei, namar kum ka seng ka don ruh ka jingshaniah ïa ki Longkmie ruh ba kin lah ban leh shibun ki kam kiba khraw na ka bynta ban kyntiew ïa ka imlang ka sahlang.
“Ka seng RBYF ka don ruh ka jingkhmih lynti ba ka jingthmu ba la buh ïa ka shnat treikam ki kynthei ka dei namar ba ka seng ka kwah ba ki Longkmie ne ki samla kynthei ruh kin sngewthuh ïa ka khia ka shon jong ka jaid bynriew bad lada don hi kata ka jingïatrei lang na ka liang ki Longkmie bad ki samla kynthei khlem pep shibun ki kam kiba khraw ngi lah ban trei na ka bynta ban pynbha ïa ka imlang ka sahlang bad khamtam ban phai khmat kyrpang ruh halor ka jingdonkam ba ka Ri Bhoi kan dang donkam ban dang kiew shaphrang ha baroh ki liang” ong u Bah R.J Thangkhiew.
Namarkata, u la buh ruh ka jingkyrpad ïa kine ki nongïalam ka Women’s Wing ba kin ai ka jingïatrei lang bad ka seng kmie ryngkat ka Byrnihat Circle ban leh shibun ki kam kiba dei na ka bynta ka bha ka miat ki paidbah ha ka thaiñ Byrnihat bad khlep pep lada don ka jingïatrei kin wan shibun ki jingkyrkhu kiba long ka jingmyntoi na ka bynta ki parado ki parasnam hapoh ka thaiñ Byrnihat hi baroh kawei, u la bynrap.
