Ban pynkhlain ïa ka synshar khaddar shim bynta ki dkhot Panchayat bad ophisar ha ka MDP, IIM Shillong

Shillong, K’Lyngkot 20: U Prof Rohit Dwivedi jong ka IIM Shillong, mynta ka sngi u la plie paidbah ïa ka Management Development Program (MDP) kaba san sngi na ka bynta ki dkhot ba la shah jied bad ki ophisar jong ka tnad Rural Development (Panchayat), jong ka sorkar Tripura, ban pynkhlain ïa ka synshar khadar bad kumjuh ruh ki kam pynroi ha ki nongkyndong bad ban kyntiew ïa ka jingtreikam ha ki bor synshar.
Ïa kane ka prokram la pynlong da ka Dr APJ Abdul Kalam Centre for Policy Research and Analysis, IIM Shillong ban pynsuk ia ki nongmih khmat ba la shah jied da u paidbah bad ki ophisar jong ki Panchayati Raj Institutions (PRIs) ban pyndep hok ïa ki kamram bad jingkitkhlieh jong ki ha ka roi ka par ha ki jaka nongkyndong, ka jingthmu, bad lumjuh ruh ka jingai jingshakri.
Haba plie ia kane ka prokram, u Prof Rohit Dwivedi, u la ban jur ïa ka bynta ba kongsan jong ki Panchayat ban ioh ïa ka roi ka par ha ki jaka nong kyndong.
U la pynpaw ïa ka jingdonkam jong ka jinglong kaba shai, ka jingkitkhlieh, ka jingthmu ba ïashim bynta lang, bad ka jingpyntrei kam hok ïa ki skhim sorkar ha ki grassroot bad u la kyntu ïa ki dkhot ba la shah jied ban pyndonkam ïa ka jingtbit ba ki la ioh ha ka por ba pynlong ïa ka prokram na ka bynta ka jingroi jong ki konstitwensi jong ki.
Ka MDP kaba san sngi kan kynthup ïa ki bynta ba kongsan, kynthup ïa ka planning & financial management jong ka PRI ne ka jingthmu bad jingpyniaid ïa ka pisa jong ki PRI, ka jingpynrung lang ha ka imlang sahlang, ka jingïaryngkat hapdeng ki shynrang bad kynthei, ka jingïashim bynta ha ka imlang sahlang bad kiwei kiwei de.