Ban pynkhlaiñ ïa ka pyrkhat pyrdaiñ ki khynnah pynlong ka Sohka Mission Village Durbar da ka Seminar

Khliehriat, Nailar 09 : Ka koit ka khiah ka long kaba donkam haduh katta katta ha ka jingim ba man ka sngi, khamtam ka koit ka khiah ha ka jingmut jingpyrkhat (Mental Health), kumta halor kane ka nongrim ka Sohka Mission Village Durbar hynnin ka sngi ka la pynlong da ka seminar kaba kyrpang ban pynshai sha ki khynnah skul bad ïa kane ka prokram la pynlong ha Community Hall Sohkha Mission, West Jaiñtia Hills District.
Ïa katei ka prokram ba kyrpang la kyrshan lang ruh da la ophis u Deputy Commissioner (Planning), West Jaiñtia Hills District kaba lyngba ka Chief Minister’s Youth Development Scheme jong u snem 2023-2024.
Ka Sohka Mission Village Durbar ka la pynlong ïa katei ka prokram khamtam eh na ka bynta ki khynnah klas X bad klas XI, XII jong ka skul Sohkha Govt Higher Secondary School, khnang ba ki khynnah kin sngewthuh ïa kiba bun ki bynta haba ïadei bad ka jingpang jingshitom kaba ktah ïaka jingmut jingpyrkhat jong ki lada wan kano kano ka jingsngewsih kaba sha palat, ka jingdiaw mynsiem, ka jingduh jingkyrmen bad ka jingsngew long marwei kaba lah ban ïalam bakla ïa ka jingmut jingpyrkhat jong ki kaba lah ban lam ruh shaduh u pud ba kin pynmynsaw ïalade na ka daw ka jingbym lah shuh ban pyrkhat.
U Head Department Psychology St Edmund’s College, Shillong, u David H. Blah u la wan ban pynshai sha ki khynnah skul bad ha kaba u la batai shai bha haor halor ki dak ki shin kiba paw shabar, ki daw bad ba kumno kiei kiei ki ktah ïa ka ym tang ïa ka jingmut jingpyrkhat hynrei ki ktah ruh wat ïa ka jingim ba shimet jong ki.
U bah H.Blah u la pynshai sha ki khynnah da kaba ong ba kane ka jingpang ka ktah namar bunsien ki kmie ki kpa na iing na sem kim lah ban ithuh ba ki khun jong ki ki la leh pher ha ka rukom kren ha ka ktien ka thylliej, ki la leh pher ha ka leit ka wan bad kane baroh ka dei namar ba ka lah ban don kaei kaei kaba ban khia ha ka jingmut jingpyrkhat jong ki.
U bah Blah u la kyntu ïa ki khynnah ba kin long kiba iaishah bad ban long kiba khlaiñ ban ieng ïaleh pyrshah ïa kino kino ki jingeh kiba wan ha ka jingim ka jong ki khnang ba kin long kiba koit ba khiah ym tang ha ka met hynrei ban khlaiñ bad ban koit ban khiah ruh ha ka jingmut jingpyrkhat.
Ïa ka seminar la pyniaid da u Chairmam VL. Gadew bad kiba la ai jingkren ki kynthup ruh u Waheh shnong Sohkha Mission, u bah P.S. Suchen, ka nonghikai jong ka Sohkha Govt. Higher Secondary School, ka ka Dr. Rimika Lanong bad u Secretary shnong Sohkha, u bah M. Manner uba la ai ruh ki kyntien ai khublei.