Ban pynjyrngam mariang bad pynitynnad ïa u surok Four-lane

Nongpoh, Naitung 01: Ka LC Woodland Dhaba lem bad ka Jiva Restaurant ryngkat ka jingïatreilang bad ki bor jong ka National Highway Authority of India (NHAI) mynta ka sngi kila thung kumba 1200 tylli ki tynrai dieng ha shilynter u surok National Highway naduh Mawdiangum ter ter shaduh Umlyngkdait da ka jingangnud ban pynjyrngam ïaka mei mariang bad kumjuh ruh ban pynitynnad ïa u surok bah haka thaiñ Nongpoh.
Ïa katei ka sienjam bala shim da ka Woodland Dhaba bad ka Jiva Restaurant la wan ruh ban ai jingkyrshan lang da ka Dorbar Shnong jong ka Mawdiangum, Umlyngkdait bad la sakhi ruh da ka jingdonlang naduh ki trai kitei ki restaurant ba kynthup ïa u Bah Joe Nongrum bad u Jiwat Vaswani, Bah Rexon Warjri Rangbah Shnong ka Mawdiangum, Bah N Makdoh Rangbah Shnong Umlyngkdait bad ki nongmihkhmat naka NHAI.
Haba kren sha ki nongthoh khubor naka liang u Bah Joe Nongrum trai ka Woodland Dhaba bad u Jiwat Vaswani trai ka Jiva Restaurant kila pynpaw ka jingangnud jong ki ban thung dieng ha katei ka sngi ha shilynter jong u surok ka long ban pynjyrngam ïaka mei mariang bad kumjuh ruh ban pynitynnad ïaka sor Nongpoh.
U la ong ruh ba ka jingpynneh pynsah ïaka mei mariang ka long kaba kongsan ban long ruh ka nuksa sha ki paidbah ba ki dei ban shim ka jingkitkhlieh ban pynneh pynsah ïaka mei mariang ban ïada ïaki mrad ki mreng kumba la donkam shisha ban sumar ïaka mei mariang kaba la sdang ban syllen lut naka jingdusmon ki paidbah.
Naka liang ki nongïalam shnong jong ka shnong Mawdiang um bad Umlyngkdait kila ai ka jingïaroh bad pynpaw ka jingsngewkmen kaba khraw halor ka sienjam bala shim da kitei ki 2 tylli ki restaurant haka thaiñ Nongpoh kiba don ka mynsiem ba sngewkhia ban ïada ïaka mei mariang bad kumjuh ruh ban pynitynnad ïaka sor Nongpoh lyngba ka jingdon jong ki dieng harud surok bah.