Ban pynjan ïa ki jaka ai jingsumar sha ki paidbah, plie u MLA ïa ka Sub Centre ha Ngunraw

Mawkyrwat, Jylliew, 17: Kum shibynta ka jingai jingshakri ïa ki paidbah jong ki shnong lyngba ka koit ka khiah, u MLA jong ka Ranikor Constituency Bah Pius Marweiñ ha ka sngi Baar ula plie paidbah ïa ka Sub Centre ha ka shnong Ngunraw, South West Khasi Hills District.
ïa kane ka Sub Centre la tei na ka skhim Pradhan Mantri Ayushman Bharat Health Infrastructure Mission (PM-ABHIM) jong u snem 2021 – 2022 ha ka jingmang pisa kaba kot T. 55 lak tam.
Lah ban kdew ruh ba kane ka Sub Centre ka kdup bad ai jingshakri ha ka liang ka koit ka khiah ïa ki san tylli ki shnong kata ka Shnong Ngunraw, ka Shnong Rangjadong, ka Shnong Mawlieh, ka Shnong Kensimphlang bad ka shnong Mawlar.
Kum ban shu pynkynmaw ba ka shnong Ngunraw ka la ïoh ïa kane ka jaka sumar ba jan ram ka dei hadien pat 20 snem ei ei naduh ba ki ki don ka jingangnud ha kaba ïa kane ka pyntrei hi da ka Village Health Council jong ka Shnong Ngunraw hapoh ka jingïalam jong u Myntri Shnong, u Secretary Shnong bad kumjuh ruh ki nongkitkam jong ka Village Health Council Ngunraw – A.
U Bah Pius Marweiñ haba kren ha ka jingïalang u la pynpaw ba kane ka jingïoh ban plie ïa kane ka jaka sumar ka dei hadien ka jingpynsngew jong ki nongkitkam shnong ba ki ki donkam palat ïa kum kine ki jaka sumar namar ki jaka sumar kiba don ruh ki long kham pajih na ka shnong kum ha Rangthong bad ha Mawkyrwat. Kumta da ka jingplie ïa kane ka Sub Centre ha shnong Ngunraw kan sa long kawei na ki lad jingïarap ïa ki briew kiba donkam jingïarap ba kyrkieh khamtam kiba pun ba kha.
U la ong ruh ba kane ka Sub Centre ym ba ka ai jingmyntoi tang ïa ka shnong Ngunraw hynrei ïa kiwei de ki shnong kiba marjan namar kane ka jaka sumar ka kdup ruh ïa ki san tylli ki shnong. Kumta u buh ka jingkyrpad ïa ki paidbah ba haba la ïoh ban plie mynta ka sngi, kim dei ban pynleh noh ei ïa ka hynrei ki dei ban shimkhia da kaba mihshakhmat ban wan phah sumar lada ki donkam bad ym tang kata ki dei ruh ban long kiba sumar khuid ïa ka khnang ba ka jingitynnad jong kan neh kumba la wan plie mynta ka sngi.
U la pynkynmaw ruh ba naduh ba u la jop kum u nongmihkhmat na ka Ranikor Constituency naduh kata ka por kum ka shnong Ngunraw kam shym la pan kiwei de ki jait kam pynroi hynrei ki la pan nyngkong ban pynbha ïa ka surok bad kumjuh ruh ban don ïa ka jaka sumar kaba jan tam, kumta halor kine ki jingpynsngew um shym la kyntait hynrei u la leh ïa kaba donkam bad pynïoh ha ki ïa ka jingdonkam baroh kumba ki la angnud.
Kiba ïa donlang ha kane ka sngi ki long Deputy Commissioner ka South West Khasi Hills District Bah B. Mawlong, ADC Bah L.T. Tariang, u District Medical & Health Officer ka South West Khasi Hills District (DM&HO) u Dr. F.R. Lartangbad ki paidbah ka shnong Ngunraw.