Shillong, Nailar 24: Watla kam don satia ki nongmihkhmat, hynrei ka seng Nationalist Congress Party (NCP) ka dang pyrshang mynta ban thaw thymmai biang ïa la ka jong ka seng ha jylla Meghalaya.
Kane ka paw da ka jingpynlong jong ka seng ïa ka state executive conference ha Sangsok kaba dang hab hapoh ka Tura constituency ban ïakren bad ïasyllok ban pynkhlaiñ biang ïa ka seng.
U State Convener jong ka NCP North-Eastern u Sanjay Prajapati bad u State President u O.K. Sangma, uba dei ruh u MLA barim, ki district, ki block, Mahila, bad ki Yuva Morcha unit ki la ïashim bynta ha kane ka jingïalang.
Ha ka jingïalang la ïakren halor ka jingthmu ban pynkhlaiñ biang ïa kane ka party, la ïakren ruh ïa ki jingeh jong ki nongshong shnong bad kiwei pat ki kam na ka bynta ka lawei jong ka seng.
U Prajapati u la banjur da kaba ong ba ka nongrim jong ka jingdon ka party ha Meghalaya ka la sdang ban khlaiñ ha kaba u la kyntu ïa ki dkhot ban ïakynduh beit beit bad ki paidbah.
U Sangma pat u la pynpaw ki jingeh haba ïadei bad ki jingduna ha ka pule puthi, ka koit ka khiah bad ka ïohkam ïohjam ha Tura bad ki thaiñ ba marjan, bad u la khot ïa ki nongtrei ka Yuva bad Mahila Morcha ban pynlong ki jingïalap ban pynsngewthuh paidbah khamtam sha ki thaiñ nongkyndong.
Katba ka Mahila Morcha ka la banjur halor ka jingdonkam ïa ki scheme ban kyntiew bad ban pynkup bor ïa ki longkmie lyngba ki lad sengkam lajong bad ki jingkyntiew ïa ki sap ki phong, na ka liang ka Yuva Morcha ka la banjur ïa ki jingdonkam ki rukom pyrkhat kam kiba wanrah ki jingkylla khnang ban lah ban pynïar ïa ka pule puthi bad kumjuh ruh ban plie ki lad ai kam ai jam.
Ki nongïalam ki shnong pat ki la pynpaw ki jingsngewkhia halor ki kam jingtei, ka jingkyrduh kam kyrduh jam bad ka jingdonkam ban ïada ïa ka sawdong sawkun. Katba na ka liang ki nongmihkhmat na ki District bad ki block ki la ïakren halor ki kam thep vote bad na ka liang u Prajapati pat u la kyntu ïa ka jingdonkam ban pyndonkam ïa ki rynsan digital bad ka social media khnang ban lah ban pynïar ïa ka party.
