Khnang ban lait na kino kino ki jingshah kynnoh bad jingbym hun jong ki samla ba ïaleh ïa ka eksamin na ka bynta ki kam Staff Nurse bad ANM ka tnad jongka koit ka khiah ka la dei ban thung da ka jingtohkit ba laitluid khnang ba lada kata ka jingtohkit ka lap ba ka biang ka rukom pynmih ïa ka result ruh ka la pynhun ïa kito kiba khlem pass hynrei lada jia ba ka lap ba kam biang ruh ban ïoh pynlong biang ïa ka eksamin kaba khuid ba suba bad ka ban pynhun ïa baroh.
Namar ha kane ka eksamin kaba la dep te naduh ka por ba ïathoh eksamin ruh la ïoh ki jingujor ba la shu ïa shong khapngiah bad ki nongpeit ne nongpynïaid ïa ka eksamin ruh kim pyrkhing hynrei ki ailad ba kiba ïaleh kin leh katba ki mon. Hooid na ka liang kine ki Nurse kiba khlem pass ruh ki la ai da ka jingthoh sha ka Director jongka Meghalaya Medical Service Recruitment Board (MMSRB) ha kaba ki la dawa ba dei ban thung da ka jingtohkit ba laitluid halor kane ka jingpynmih ïa ka result kaba kynrum kynram namar tang hapoh ka shisngi la pynmih arsien ïa ka result. Kane ka jingkynrum kynram jongka jingpynmih ïa ka result ka la pynbitar bad pyndiaw mynsiem ïa baroh ki samla kiba ïaleh ïa katei ka eksamin ïoh kam khamtam kito kiba ka rta jongki ka la ïaid ne jan kut ka por thep kam. Namar na ki palat 5 hajar ngut kiba ïaleh kiba pass ki long tang kumba san spah ngut ei ei kumta kiba bun bah ki dei kiba pheil bad ka sorkar ka dei ban sngap ïa ka sur jong kiba bun ba lang. Hooid ka lah ban leh da kaba sangeh shwa ban thung kam ïa kito kiba la pass katba ka jingtohkit ka dang ïaid namar lada jia ba kine ki samla ki bym pass ki kiew sha ïing lieh ïing saw ruh khlem pep ka ïing bishar ba donburom kan phah ban pynsangeh beit ïa ka jingthung kam katba ka jingbishar kam pat dep. Kumta khnang ban lait kano kano ka kynrum kynram ka sorkar ka dei ban pyrkhat jngai bha ïa kane ka kam.
Nalor kata kaba pynsngewsih ïa kito kiba khlem pass ka long ba hadien ka jingïakynduh bad ka myntri hadien ba la mih ka result la ïakut ba ïa kaei kaba la ïakren ha katei ka jingïakynduh yn sa phah sha baroh ki samla ba thep kam nurse hynrei haduh mynta ruh katei kam shym la jia long. Shwa ban long ka eksamin ruh la dep ïakut lypa bad ka tnad ka koit ka khiah ba dei ban pyrkhing bha ïa ka rukom pynlong ïa ka eksamin namar ka dei kaba yn jied beit tang ïa kiba wan shakhmat. Ha ka jingshisha la dei ban don ki list kiba pynpaw ïa kiba lah ban thoh eksamin bad ïa ki bym lah ban thoh ruh, ïa kiba pep ruh dei ban pynpaw kyrteng bad roll number ban lait na kino kino ki jingshah kynnoh. Nangta haba pynmih ïa ka result ruh la dei ban ai bad u roll number, ïa ki kyrteng bad katno ki ioh hynrei ia kane ym shym la leh naduh ba sdang hynrei dei hadien ba mih ki jingdawa sa pynmih ïa ka result kata ruh tang ki roll number bad ki mark. La kynnoh ruh ba kumba 13 tylli ki jingkylli la wanrah na shabar ka syllabus ba la ai ïa kiba thep kam. Ki don ki jingkylli kiba ym ïahap bad ka syllabus bad ka rukom buh ïa ki jingkylli ruh ka long ka bym shai bad kaba pynkulmar ïa ki nongïaleh eksamin. Ynda la pynmih ïa ka result ki don ki number kiba mih arsien ruh. ïa ka result la pynmih haduh laisien lai wat bad ki don ki number kiba dang rung thymmai ha ka list jong ka result ruh. Wat kiba ïoh mark haduh 72 ruh ki don haduh 26 ngut hynrei ha ka list jongka result ki don tang 22 ngut.
Kumta halor kitei ki kynrum kynram ka la dei ïa ka tnad ka koit ka khiah ban phah tohkit da ka kynhun ba laitluid khnang ban shai bad hun lut ki samla ba thep kam nurse namar lada ka sorkar ka kwah ban lait na kino kino ki jingshah kynnoh hynrei lada ka sorkar kam shim khia bad kheiñ sting ïa kane ka kam ym tip kaei ka ban jia ruh namar kine ki khun samla kiba thep kam nurse te kim hun shuh satia ïa ka result ba la dep pynmih.
